Ираны эрх баригчид өнгөрсөн сарын сүүлээс хойш улс даяар өрнөсөн засгийн газрын эсрэг жагсаалын үеэр 3,000  гаруй хүн амиа алдсан гэж мэдэгдлээ. Энэ нь нас баралтын тоог албан ёсоор зарласан анхны тохиолдол болж байна.

Ираны төрийн мэдлийн телевиз өчигдөр (2026.01.21) мэдээлэхдээ, “гадаадаас дэмжлэгтэй" сүүлийн үеийн террорист үйлдлүүдийн улмаас аюулгүй байдлын хүчний алба хаагчдыг оролцуулан нийт 3,117 хүн амь насаа алдсан гэжээ. Исламын хувьсгалт гвардтай холбоотой Тасним мэдээллийн агентлаг мөн адил мэдээлэл гаргасан байна.

Харин "Reuters" агентлаг Ираны албаны хүмүүсийн хэлснээс эш татан, эмх замбараагүй байдлын үеэр аюулгүй байдлын хүчнийхэнтэй нийлээд дор хаяж 5,000 хүн амиа алдсан гэж мэдээлж байсан юм.

Сүүлийн үед томоохон жагсаал, цуглаан болсон талаар мэдээ гараагүй бөгөөд засгийн газар эсэргүүцлийн хөдөлгөөнүүдийг “хяналтдаа авсан” гэж мэдэгдсэн байна. Иран улс нэгдүгээр сарын 8-наас хойш улс даяар интернэт хандалтыг эрс хязгаарласан хэвээр байгаа. Жагсаал, эсэргүүцлийн бодит цар хүрээ одоогоор бүрэн тодорхойгүй байна.