Засгийн газраас Монгол Улсын иргэн бүр 2030 он гэхэд хуримтлалын дансандаа 10 сая төгрөг хуримтлуулах тооцооллыг хийжээ. Энэ бол Ерөнхий сайд Г.Занданшатарын LEGACY. Ингэхгүй бол Монгол Улсын эдийн засгийн хараат байдал улам нэмэгдэж, халтиргаа гулгаатай "зам" руугаа орно гэдгийг тэрбээр "Цаг үе-үйл явдал" ярилцлагын төгсгөлд яриандаа онцолсон юм. Өөрөөр хэлбэл, Үндэсний баялгийн сангийн асуудлыг дахин эргэн харж, холбогдох хууль эрх зүйн орчныг шинэчлэх гэнэ.

ТАВАН ОРД ГАЗРАА АРД ТҮМЭНДЭЭ ӨГӨӨЖТЭЙ БОЛГОЖ, ҮНДЭСНИЙ БАЯЛГИЙН САНД ТӨВЛӨРҮҮЛНЭ

Ерөнхий сайд Г.Занданшатар "Манай Засгийн газар байгуулагдаад долоо хоногийн дараа нийгмийн шударга ёсыг сэргээх, авлига хээл хахуультай тэмцэх, Үндэсний баялгийн санг амилуулах албан даалгаврыг гаргаж, ажлын хэсэг байгуулсан. Тэр дотор бүх стратегийн орд газруудын олгох, эзэмшсэн байдалд дүн шинжилгээ хийж, ард түмэндээ өгөөжтэй байлгах ажлын төлөвлөгөө гаргаж үүргийг өгсөн. Ажил дэс дараатай хэрэгжиж байна. Бид энэ албан даалгаврынхаа хэрэгжилтийг хянаж, стратегийн орд газруудын 34-өөс дээш хувийг төрийн мэдэлд шилжүүлж, ард түмэнд өгөөжтэй болгох асуудлаар тодорхой шийдвэр гаргах төлөвлөгөөг баталсан.

Эхний ээлжинд таван орд газраа ард түмэндээ өгөөжтэй болгож, Үндэсний баялгийн санд төвлөрүүлэх ажлыг шийднэ.

Дараагаар нь УИХ-д ирэх гуравдугаар сард хаврын чуулганаар стратегийн орд газруудаа, Үндэсний баялгийн сангаа амилуулсан тогтоол өргөн барина. Ингэснээр бид ард иргэдээ хуримтлалын сантай болгож, орон сууцжуулах, эрүү мэнд, боловсролдоо зарцуулах өөрчлөлтийг хийнэ. Үүнийг бэлэн мөнгө хэлбэрээр бус хуримтлал байдлаар бий болгоно. Хэмнэлтийн бодлогын үр дүнд 2026 онд Ирээдүйн өв санд 1.5 тэрбум ам.долларыг хуримтлуулж чадсан. Үндсэндээ 5.7 их наяд төгрөг. Дээр нь бид Хуримтлалын сандаа нийт 239 сая орчим ам.доллар буюу 954 тэрбум төгрөгийг төвлөрүүлсэн. Энэ мөнгөө дараад хадгалахгүйгээр эдийн засгийн эргэлтэд оруулах юм. Бүтээн байгуулалтад энэ хуримтлалаа ашиглах хуулийн төсөл боловсруулж, УИХ-д өргөн барих юм. Энэ жил Ирээдүйн өв сангийн 1.5 тэрбум ам.доллараа Хуримтлалын сантайгаа нийлээд 2.2 тэрбум ам.доллар болох зорилт тавьсан" гэсэн юм.

НЭГ ХҮНД ОНОГДОХ ХУРИМТЛАЛЫГ ЭНЭ ЖИЛ НЭГ САЯ ТӨГРӨГТ ХҮРГЭНЭ

Мөн тэрбээр "Баялгийн хулгайтай тэмцэх асуудал манай Засгийн газрын тэргүүлэх зорилт. Тийм учраас байгуулагдсан өдрөөсөө Тавантолгой нүүрсний орд газар дээр онцгой дэглэм тогтоосноор экспорт 16.6 дахин нэмэгдэж, үр ашиг хоёр дахин сайжирсан. Тийм учраас олон улсын зах зээл дээр нүүрсний үнэ буурсан ч Засгийн газраас тэтгэвэр, тэтгэмж, цалин хөлсийг нэмэгдүүлэх эх үүсвэрийг бий болгож чадсан. Гэхдээ Монгол Улсын ДНБ-ий хэмжээ 100 их наяд төгрөг хүрэхгүй. 100 их наяд төгрөгийн ДНБ-тэй улс 70 их наяд төгрөгийг алдах боломжгүй. Манай нүүрсний нийт экспортын хэмжээ 15 тэрбум ам.доллар. Ер нь хулгай байгаа юу гэвэл байгаа. Төрийн бүх шатанд буюу уурхай, нүүрс, гааль, татвар гэх мэт цэгцлэх ажил өрнөж байна. Энэ ажлыг нэг өдөр л өргөс авсан юм шиг арилахгүй. Тогтолцооны шинж чанартай байдаг асуудал учраас нэг хүний асуудлаар тогтохгүй. Хүндээ ч байна, тогтолцоондоо  ч байна.

Тийм учраас эдгээр асуудлыг нэг мөр цэгцлэх "Цэгцрэх" хөдөлгөөнийг өрнүүлж байна.

Энэ хүрээнд бид баялгийн хулгайтай тэмцэж, 300 хоногийн ажлын төлөвлөгөөг гаргасан. Уг төлөвлөгөөний дагуу Таван жилийн үндсэн чиглэлийг хэрэгжүүлж, ард иргэдийн нэрийн данстай хуримтлалын дансыг үр дүнтэй болгоно. Ингэхдээ Ирээдүйн өв сан, Хуримтлалын санг үр ашигтай болгож, нэг хүнд оногдох хуримтлалыг энэ жил нэг сая төгрөгт хүргэх зорилтыг тавьж байна. Иргэдийг ирээдүйдээ итгэлтэй, орлоготой болгож, байгалийн баялаг нь хулгайд бус Баялгийн санд төвлөрч, ард иргэдэд зарцуулдаг хууль эрх зүйн орчинг бүрдүүлнэ. Гэхдээ бид бэлэн мөнгө тараахыг чиглэл болгохгүй. Сая цалин, тэтгэвэр, тэтгэмж гээд нэг дор нэмэхэд инфляцийг хөөрөгдөж байна. Монгол Улсын үндэсний үйлдвэрлэл сул хөгжиж, импортын эдийн засагтай учраас дотоодын эдийн засгаас гарч байгаа мөнгө болгоны 60 хувь нь инфляцийг хөөргөдөж, гадаад валютыг гадагшлуулж байна. Энэ нь ард иргэдийн дунд үнийн өсөлтийн хулгай болж байгаа юм. Энэ асуудлыг нь цогцоор нь шийдэх "Цэгцрэх" хөдөлгөөнийг өрнүүлж байна" гэсэн юм.

ЯДУУРЛЫГ 2 ДАХИН БУУРУУЛЖ, НЭГ ХҮНД НОГДОХ ДНБ-ИЙГ 10 МЯНГАН АМ.ДОЛЛАРТ ХҮРГЭНЭ

Үүнээс гадна Засгийн газраас "Баялагтай эзэн байх Монгол" хөтөлбөрийн хүрээнд томоохон орд газруудыг эдийн засгийн эргэлтэд оруулж, баялгийн үр өгөөжийг ард иргэдэд хүртээн, хүүхдийн хуримтлалын дансыг шинээр нээх гэнэ. Төрийн өмчийг олон нийтийн хяналтыг бий болгож, Олон нийтийн хяналтын зөвлөлийн тухай хуулийг боловсруулж, УИХ-д өргөн барих аж. Ингэснээр төрийн өмчийн компаниудын Төлөөлөн Удирдах Зөвлөл, яам болгон дээр олон нийтийн хяналтыг бий болгоно. Ийм зорилгоор төрийн өмчийн компаниуд дээр 10-34 хувь хүртэлхийг олон нийтийн хяналт тавьдаг механизмыг бий болгох юм байна.

Ерөнхий сайд Г.Занданшатарын хувьд МҮОНРТ-ийн "Ерөнхий сайдаас асууя" олон нийтийн хэлэлцүүлгээр "Нэн ялангуяа стратегийн шинж чанартай цахилгаан станцууд дээр арт түмний хяналт байх шаардлагатай байна. Тэгэхгүй бол сүүлд гарсан хэрэг явдлууд эрчим хүчний салбарт хулгай, авлига байгааг нотолж байна. Ингэж байж хүн өөрийн өмчийг хянадаг шиг төрийн өмчид хяналт тавихгүй бол эзэнгүй өмч шиг төрийн компаниудын хулгай даамжирсан байна. Үүнийг таслан зогсоох ёстой.

Иргэдээ "Баялагтай эзэн байх Монгол" хөтөлбөрийн хүрээнд эхний ээлжинд 1.3 сая хүүхэд, 500 мянга гаруй ахмад настан, 108 мянган хөгжлийн бэрхшээлтэй иргэдэд хуримтлалын данс нээнэ. Мөн "Цэгцрэх" хөдөлгөөнөөр хэмнэлттэй, хяналттай, хариуцлагатай төр гэсэн нийт найман реформыг хийхээр төлөвлөсөн. Ингэснээр ядуурлыг хоёр дахин бууруулж, нэг хүнд ногдох ДНБ-ийг 10 мянган ам.долларт хүргэнэ" гэсэн юм.