Ерөнхий сайдын чиглэлийн дагуу Эдийн засаг, хөгжлийн яам болон Эрчим хүчний яамны удирдлагууд уулзалт зохион байгуулж, Монгол Улсын эрчим хүчний салбарт тулгамдаж буй асуудал, цаашдын хөгжлийн чиг хандлага, бодлогын уялдааг хангах талаар санал солилцжээ.

Уулзалтаар Эрчим хүчний сайд Б.Чойжилсүрэн эрчим хүчний салбарын мөнгөн хөрөнгийн дутагдал, санхүү, эдийн засгийн байдал, үнэ тарифын талаар мэдээлэл өгсөн байна. Эрчим хүчний яамны Төрийн нарийн бичгийн дарга Б.Ерэн-Өлзий Монгол Улсын эрчим хүчний салбар нь эх үүсвэрийн дутагдал, өсөн нэмэгдэж буй хэрэглээ, тоног төхөөрөмжийн насжилт зэрэг олон хүчин зүйлээс шалтгаалан эрсдэлтэй нөхцөл байдалд орж буйг онцлон тэмдэглэжээ. Эрчим хүчний салбарын тогтвортой байдлыг хангах, эдийн засгийн өсөлтийг дэмжих зорилгоор хамтарсан судалгаа, дүн шинжилгээ хийх, бодлогын шийдэл, хөтөлбөр боловсруулах чиглэлээр нягт хамтран ажиллахаар тохиролцсон байна.

Эдийн засаг, хөгжлийн сайд Ж.Энхбаяр эрчим хүчний салбар нь эдийн засгийн өсөлт, аж үйлдвэржилт, бүс нутгийн хөгжлийн суурь нөхцөл болохыг онцолж, салбарын хөрөнгө оруулалтыг дунд болон урт хугацаанд тогтвортой нэмэгдүүлэх, томоохон эх үүсвэрийн төслүүдийг эрчимжүүлэх, санхүүжилтийн шинэ механизм, төр, хувийн хэвшлийн түншлэлийг идэвхжүүлэх шаардлагатайг тэмдэглэжээ.

Уулзалтын төгсгөлд талууд эрчим хүчний салбарын тулгамдсан асуудлыг үе шаттайгаар шийдвэрлэх, хэрэгжиж буй болон төлөвлөж буй төслүүдийг улсын хөгжлийн бодлоготой уялдуулах, салбар хоорондын зохицуулалтыг сайжруулах чиглэлээр хамтран ажиллахаар санал нэгдсэн байна. Эрчим хүчний үнэ, тарифийн асуудлаар Засгийн газрын хуралдаанд танилцуулахаар тогтжээ.