"Тавантолгой" дулааны цахилгаан станцын хуулийн "гацаа"-г ирэх хаврын чуулганаар УИХ-аар хэлэлцэх хүлээлттэй байна. Ингэснээр олон жил гацсан бүтээн байгуулалтын тендерийг дахин зарлаж, үргэлжлүүлэх боломж бүрдэнэ гэдгийг Эрчим хүчний сайд Б.Чойжилсүрэн хэлсэн юм. Тэрбээр "Тавантолгой" дулааны цахилгаан станцын тухайд 2023 оны долдугаар сард тендер зарласан. Хоёр компани тендерт оролцсон  ч хоорондоо маргасаар байгаад гурван шатны шүүхийн шийдвэр гарсан. Тендерийг дахин зарлах шийдвэр гарсан. Гэтэл 2024 оны нэгдүгээр сарын 1-нээс Тендерийн тухай хуульд нэмэлт өөрчлөлт оруулж, түлхүүр гардуулах нөхцөлтэйгөөр тендер зарлах боломж хаагдаж, хуулийн өөрчлөлтийн дараагаар энэ станцын тендерийг зарлах хууль эрх зүйн орчин бүрдэнэ. Тийм учраас 2025 онд Эрчим хүчний тухай хуульд өөрчлөлт оруулах тухай, Төр, хувийн хэвшлийн түншлэлийн тухай хууль, Өрийн удирдлагын тухай хуульд өөрчлөлт оруулах тухай хуулийн төсөл УИХ-д өргөн барьсан. Эдгээр хуулийн төслүүдийг намрын чуулганаар хэлэлцэж амжсангүй. Ирэх хаврын чуулганаар хэлэлцэх байх гэсэн хүлээлттэй байна" гэв.

Харин Өмнөговь аймгийн Засаг дарга Н.Энхбат саяхан хэвлэлд ярилцлага өгөхдөө "Анх удаагаа орон нутгаас 500 тэрбум төгрөгийн бонд босгож, дулааны цахилгаан станц барихаар төлөвлөж байна.  Гурван жилийн хугацаатай бонд босгох Засгийн газрын шийдвэр гарсан. Эхний жилд 150 тэрбум төгрөгийг босгох бол 2027 онд 300 тэрбум, 2028 онд үлдсэн 50 тэрбум төгрөгөө босгоод 50 МВт-ын дулааны цахилгаан станцаа барина" гэсэн юм.

"Тавантолгой" дулааны цахилгаан станцын төслийн гүйцэтгэгчийг сонгон шалгаруулах олон улсын нээлттэй тендерийг түлхүүр гардуулах нөхцөлтэйгөөр 2021 оны аравдугаар сард болон 2022 оны тавдугаар сард тус тус зарласан ч амжилтгүй болсон.

Сүүлд Засгийн газраас станцын төслийг 300МВт+150МВт гэсэн хоёр үе шат болгон хувааж, эхний ээлжинд 300МВт-аар барьж байгуулах төсөлд дахин тендер зарласан. Өнгөрсөн 2023 оны долдугаар сард зарласан уг тендерт хоёр оролцогч санал ирүүлсэн. Нэгдүгээрт, Камбожийн Хаант Улсын “Mitime International” компани, хоёрдугаарт, БНХАУ-ын China Western Power Industrial компани, Beijing Beizhong Steam Turbine Genetator компани болон Монгол Улсын “Майнс Ап” ХХК-ийн түншлэл байжээ. Тендерийн хороо “Mitime International” компанийг шалгаруулсан боловч “Майнс Ап” ХХК-ийн түншлэл гомдол гаргасан тул Сангийн яам уг тендерийг түр түдгэлзүүлж, дахин үнэлэх чиглэл өгчээ. Гэвч тендерийн хүчинтэй хугацаанд дахин үнэлгээ хийж, гүйцэтгэгчийг сонгон шалгаруулах, гэрээ байгуулах боломжгүй болж, уг тендер хүчингүй болсон юм.

ТӨСЛИЙН ЕРӨНХИЙ ГҮЙЦЭТГЭГЧИЙГ 2026 ОНЫ 2 ДУГААР УЛИРАЛД БАГТААН СОНГОН ШАЛГАРУУЛНА

"Тавантолгой" 450 МВт-ын дулааны цахилгаан станц барих төслийн бэлтгэл ажил 100 хувь хангагдсан бөгөөд төслийн ерөнхий гүйцэтгэгчийг 2026 оны хоёрдугаар улиралд багтаан сонгон шалгаруулан, барилга угсралтын ажлыг 36 сарын хугацаанд хэрэгжүүлэхээр төлөвлөжээ. Гүйцэтгэгчийг сонгон шалгаруулсны дараа барилга угсралтын ажлын гэрээ байгуулж, төслийн өртөг, гүйцэтгэгчийн санхүүжилтийн хэмжээг эцэслэн тогтоох гэнэ.

Ерөнхий сайд Л.Оюун-Эрдэнийн танхимаас зарласан 14 мега төслийн нэг нь "Тавантолгой" дулааны цахилгаан станц. Улаанбаатар хотоос 570 км зайд байрлах "Тавантолгой" дулааны цахилгаан станц нь Тавантолгойн нүүрсний уурхайтай залгаа байрладаг. Уг станцыг Өмнөговь аймгийн Цогтцэций сумын нутагт орших “Эрдэнэс-Тавантолгой” ХК-ний нүүрс баяжуулах үйлдвэрийн дэргэд барьж байгуулахаар төлөвлөж буй. Өнгөрсөн 2013 оноос эхлэн хэлэлцээрийн шатанд 10 гаруй жил гацсан" Тавантолгой" 450 МВт-ын дулааны цахилгаан станцын төслийг хэрэгжүүлснээр Оюутолгой, Тавантолгойн орд газрууд, бусад стратегийн ач холбогдолтой өмнөд бүс нутгийн уул уурхайн төслийн цахилгаан эрчим хүчний хэрэглээг дотоодоос хангах боломж бүрдэнэ гэдгийг албаныхан онцолж байв.

Энэ зорилтынхоо хүрээнд станцын бүтээн байгуулалтыг 2028 онд ашиглалтад оруулахаар төлөвлөсөн юм.

"Тавантолгой" дулааны цахилгаан станц ашиглалтад орсноор жилд 3.2 тэрбум КилоВатт/цаг цахилгаан эрчим хүч үйлдвэрлэн БНХАУ-аас импортолж буй Өмнөд бүсийн эрчим хүчний системийн нийт хэрэглээний 93 хувийг дотоодын эрчим хүчний эх үүсвэрээс хангаж, дунджаар нэг жилд зарцуулж буй 120-140 сая ам долларын гадагшаа чиглэсэн валютын мөнгөн урсгалыг  дотоодод үлдээх боломжтой гэх тооцоолол бий.

"ТАВАНТОЛГОЙ ДУЛААНЫ ЦАХИЛГААН СТАНЦ" ТӨХХК"-ИЙН ЗАХИРАЛ Г.ТЭНГЭРИЙГ ЭЛЧИН САЙДААР ТОМИЛОВ

Монгол Улсын Засгийн газраас олон жил гацсан "Тавантолгой" дулааны цахилгаан станц барих ажлыг эрчимжүүлэхээр "Тавантолгой дулааны цахилгаан станц" ТӨХХК-ийг 2020 онд байгуулсан. Гэвч тус компанийг байгуулсан ч төсөл урагшилсангүй. Өнгөрсөн 2025 оны арванхоёрдугаар сард “Тавантолгой дулааны цахилгаан станц” ТӨХХК-ийн гүйцэтгэх захирал Г.Тэнгэрийг Австрали улсад суух Онц бөгөөд Бүрэн эрхт Элчин сайдаар томилоод буй.

Монгол Улсаас Австралийн Холбооны улсад суугаа Онц бөгөөд Бүрэн эрхт Элчин сайд Дамдинсүрэнгийн Даваасүрэнг эгүүлэн татаж, Гончигзэвэгийн Тэнгэрийг томилох шийдвэрийг гаргасан. Тэрбээр дипломат албанд 11 жил ажилласан байна. Түүний хувьд 1993 онд Технологийн их сургуулийн компьютерын техник менежментийн сургууль, 1994 онд Токиогийн гадаад хэлний дээд сургууль, 1998 онд Японы Ёкохамагийн Үндэсний дээд сургуулийг удирдлагын ухааны мэргэжлээр суралцаж, төгсчээ. Мөн 2016 онд МУИС-ийн Нийгмийн ухааны их сургуулийг улс төрийн магистрын зэрэг хамгаалсан байна. Англи, япон, орос хэлний мэдлэгтэй.

Түүний хувьд 2019-2020 онд "Эрдэнэт үйлдвэр"-ийн газрын дарга, 2020 оноос эхлэн "Тавантолгой" дулааны цахилгаан станц ТӨХХК-ийн гүйцэтгэх захирлаар ажиллаж байжээ.