Кремль эртнээс нааш АНУ, Европын хооронд ан цав үүсгэж, барууны өрсөлдөгчдөө хагаралдуулан сулруулах стратегийг баримталжээ. Учир нь барууныхан Зөвлөлтийн үеийн нөлөө, хүч чадлаа дахин олж авах, газар нутгаа тэлэх гэсэн Оросын хүсэл эрмэлзэлд олон жил тууштай саад болсон билээ. Хариуд нь ОХУ янз бүрийн хорлон сүйтгэх ажиллагаа, хуурамч мэдээлэл түгээх бодлогыг идэвхтэй явуулдаг.

Нэн ялангуяа Орос, Украины дайн эхэлснээс хойш Кремлийн туйлын хүсэл НАТО-г задлах болов. НАТО тэлж магадгүй гэх тайлбараар Кремль дөрвөн жилийн өмнө эхлүүлсэн дайнаа үргэлж зөвтгөдөг.

Тэгвэл Оросын хувьд хүсэн хүлээсэн мөч нь тун ойрхон ирэв бололтой. Оросын заналхийллийн эсрэг 80 жилийн турш хамгаалалтын бамбай болж ирсэн НАТО эцэстээ Гренланд гэх санаанд оромгүй асуудлаас болж задран унах дөхөөд байна. АНУ-ын ерөнхийлөгч Дональд Трамп Дани улсын хагас автономит нутаг дэвсгэр Гренландад санаархах болсныг Кремль хөндлөнгөөс анхааралтай ажиглаж байна.

Европын холбооны гадаад бодлогын тэргүүн Кажа Каллас Трампын тарифын сүрдүүлгийн дараа мэдэгдэл хийхдээ "Хятад, Орос хоёр үнэхээр баярлаж байгаа нь лавтай" гэжээ.

АНУ л Гренландыг хяналтдаа авахгүй бол Орос, Хятад хоёрт арлыг алдах болно гэж Трамп мэтгэдэг. Энэ санааг Орос, Хятадын хэн хэн нь эрс үгүйсгэдэг бөгөөд Данийн цэргийнхэн хүртэл зүүн зүгээс ирэх бодит аюул заналхийлэл байхгүй гэж мэдэгдсэн удаатай.

Гренландыг авах санаагүй гэж байгаа ч гэлээ Оросын төрийн телевизүүд өөр зүйл өгүүлж байгааг "CNN" мэдээлжээ. Тодруулбал, Кремлийг дэмжигч хэвлэлүүд Трампын Гренландтай холбоотой гаргасан шийдвэр бүрийг "НАТО-д өгч буй сүйрлийн цохилт", "Оросын хувьд үнэхээр ашигтай алхам" гэж баяр хөөртэйгөөр бичиж байна.

НАТО сүүлийн хэдэн 10 жилд үзээгүй хямралтайгаа нүүр тулснаар Украинд үзүүлэх дэмжлэг нь суларна гэж үзэж байна. Ингэснээр ОХУ дайны талбарт давуу тал олж авна гэсэн ойлголт Москвад өргөн дэлгэр таржээ. Хатуухан хэлбэл, энэ нь Украины хувьд бодит байдал байж мэдэх юм.

Гэхдээ оросууд оргилуун дарсаа хараахан буудуулаагүй байсаар. Хэдийгээр хэвлэл мэдээлэл, олон нийтийн хандлага нэг янз байгаа ч Орос улс албан ёсны байр суурь бараг илэрхийлээгүй, нам гүм байгаа юм. Нам гүм гэхээсээ илүү эл асуудалд шүүмжлэлтэй хандсан гэхэд ч болно. Тодруулбал, Кремлийн хэвлэлийн төлөөлөгч Дмитрий Песков "Трамп Гренландыг авна гэснээрээ олон улсын эрх зүйн хэм хэмжээнээс гадуур үйлдэл хийж байна" гэж мэдэгдсэн юм.

Кремль өөрсдөө олон жилийн турш олон улсын хууль эрх зүй, хэм хэмжээг зөрчсөн атлаа ийм хоржоонтой мэдэгдэл хийсэн аж.

АНУ Гренландыг хянах нь Арктикийн бүс нутаг дахь Оросын ноёрхолд бодитой сорилт болж мэднэ. Мөн цэрэг, эдийн засгийн хүчээ дэлхий даяар гайхуулж, тааварлашгүй байдлаараа тархи ажиллуулах болсон Трампын засаг захиргаа Оросыг түгшээж байна.

Ерөнхийлөгч Путин шинэ оны анхны гадаад бодлогын илтгэлдээ ч энэ асуудлыг дурдсан. Тэрбээр "Дипломат харилцаа, харилцан буулт, харилцан ашигтай шийдэл олох оролдлого бүрийг нэг талыг барьсан аюултай үйлдлүүд орлох боллоо. Улс орнууд хоорондоо харилцан яриа өрнүүлэхийн оронд хүчтэй нь дийлдэг гэсэн зарчмаар өөрсдийн нэг талыг барьсан үзэл санааг нөгөөдөө тулгаж, бусдын хэрхэхийг зааж, тушааж болно гэж бодоод байна" гэсэн юм. Путин өөртөө дүгнэлт хийхгүй хэрнээ олон улсын тавцан дахь АНУ-ын үйлдлийг энэ үгээрээ илэрхийлж байгаа аж.

Геополитикийн сөргөлдөөн дунд Оросын холбоотон, түншүүд ч задран, бутарч эхлэв.

Тухайлбал, Сирийн дарангуйлагч, Путины ойрын түнш Башар аль-Ассадыг өнгөрсөн онд засгийн эрхнээс түлхэн унагасан билээ. Түүнчлэн олон жилийн турш Оросын холбоотон байсан Иран ч Израилийн хүчтэй цохилтод өртөв. Өдгөө Иранд засгийн газрын эсрэг жагсаал цуглаан үргэлжилж, дахин цохилтод өртөж ч магадгүй болоод байна. Мөн энэ сарын эхээр АНУ-ын хүчнийхэн Кремлийн дуртай удирдагч, Венесуэлийн ерөнхийлөгч Николас Мадурог баривчилсан нь Москвагийн хувьд бас нэг сорилт боллоо. Венесуэль ажиллагааны дараа Оросын уламжлалт түнш Куба ч АНУ-ын бай болж магадгүй байна.

ОХУ дэлхийн хоёрдугаар дайны дараах дүрэмд суурилсан олон улсын дэг журмыг Кремлийг хааж боох гэсэн барууныхны давхар стандарт гэж үл тоомсорлосоор ирсэн. Эсрэгээрээ ОХУ хүч хэрэглэн хил хязгаарыг өөрчлөхийг хориглосон НҮБ-ын дүрмийг ил тод зөрчиж, өөрсдийн үзлээ тулгаж буй. Гэтэл эцэстээ АНУ хүртэл Оростой адил авирлаж байгаа нь Кремлийн хувьд нэг ёсондоо ялалт болж байх шиг.

Ямартай ч ялалтын баяр тэмдэглэхэд арай эрт байна. Энэ ялалтын дараа ямар аюултай шинэ дэлхий ертөнц бидний өмнө нээгдэх вэ гэдэг тодорхойгүй. Илүү тогтвортой, урьдчилан таамаглах боломжтой АНУ-ын засаг захиргаатай харьцаж дассан Кремлийн хувьд улам түрэмгий, тогтворгүй Трамптай нүүр тулах нь амаргүй сорилт болно.

Оросын нөлөө бүхий “Московский комсомолец” хэвлэлд Трампыг "Галзуугийн эмнэлгийн ерөнхий эмч" гэж нэрлэжээ. Ингээд зогсохгүй "Галзуугийн эмнэлгийн ерөнхий эмч өөрөө ч бас галзуурчих шиг боллоо. Бүх зүйл орвонгоороо эргэж, нуран унаж байх шиг мэдрэмж төрж байна" гэж бичжээ.