Ираны хэд хэдэн төрийн телевиз Ням гаригт /2026.01.18/ хакердуулжээ. Тодруулбал, энэ үеэр хуваарьт хөтөлбөрүүд тасалдаж, оронд нь цөллөгт байгаа ханхүү Реза Пахлавигийн дүрс болон засгийн газрын эсрэг жагсаалын хэсгүүдээс цацсан байна.

“The Associated Press”-ийн мэдээлснээр Пахлавигийн хоёр бичлэг болон Ираны аюулгүй байдлын хүчнийхнийг олон нийтийн талд орохыг уриалсан графикыг дэлгэцээр харуулжээ.

Тус график дээр “Иргэд рүү буу шагайхаа боль. Ираны эрх чөлөөний төлөө нэгдэнэ үү” гэсэн бичиг гарсан байв. Пахлавигийн хувьд Исламын бүгд найрамдах улсыг нурааж, иргэдтэй нэгдэхийг Ираны армид уриалж буй бичлэг гарчээ. Тэрбээр “Надад армид хэлэх тусгай мессеж байна. Та нар бол Ираны үндэсний арми. Исламын бүгд найрамдах улсын арми биш. Та бүхэн өөрсдийнхөө амийг аврах үүрэгтэй. Та нарт тийм их цаг үлдээгүй. Ард иргэдтэйгээ аль болох хурдан нэгд” гэх аж.

Иранд засгийн газрын эсрэг жагсаал эхлээд 22 хонож байна. АНУ-д төвтэй “HRANA” хүний эрхийн агентлагийн мэдээлснээр, өнгөрсөн өдрүүдэд их бага хэмжээний 624 жагсаал цуглаан бүртгэгджээ. Мөн дор хаяж 24669 хүн нас барсан байна. Эндээс 3600 гаруй нь жагсагчид байсан бол 9000 хүний үхлийг мөрдөн шалгаж байна.