Улаанбаатар хотын захирагч Х.Нямбаатар нийслэлд үйл ажиллагаа явуулж буй ТҮЦ-ийг буулгах, үйл ажиллагааг нь хязгаарлах шийдвэр гаргаж нийтийн эзэмшлийн гудамж талбай, явган хүний замыг хаасан ТҮЦ-ийг ачсан. Гэвч ТҮЦ эрхлэгчид Улаанбаатар хотын захирагч Х.Нямбаатартай удаа дараа уулзаж ТҮЦ-ийг хотын төвд байрлуулж үйл ажиллаагаа эрхлэх хүсэлтэй байгаагаа мэдэгдсэн. Үүний хүрээнд 2026 оны нэгдүгээр сарын 26-ны өдөр уулзахаар болжээ. Энэ талаар ТҮЦ эрхлэгч Б.Дугармаагаас тодрууллаа.

-Улаанбаатар хотын захирагч Х.Нямбаатартай бид бүхэн өнгөрөгч оны хоёрдугаар сарын 9-ний өдөр хамгийн анх уулзсан. Тухайн уулзалтад хотын дарга өөрийн хэлэх гэсэн үгээ хэлж, ярьж байгаад  уулзалтыг орхиж явсан гэж ойлгож болно. Нийслэлээс нийт 1200 гаруй ТҮЦ-ийг ачсан бөгөөд тэр хэмжээгээр үйлчилгээ эрхлэгчид ажилгүй болсон. Тиймээс ТҮЦ-ийг ажиллуулах тал дээр 300 гаруй үйлчилгээ эрхлэгчид нэгдэж Улаанбаатар хотын захирагчтай уулзаж байна. Нөгөө талаараа ТҮЦ-ийн асуудлыг хөндөхгүй, чимээгүй үлдсэн ТҮЦ эрхлэгчид нь ихэвчлэн цагдаа, төрийн албан хаагч, эрх мэдэл бүхий хорооны гишүүд, хэсгийн ахлагчид гэж ойлгосон. Тухайн хүмүүс ТҮЦ-ээ өөрсдөө ажиллуулдаггүй, бусдад түрээсэлдэг байсан бөгөөд үнэ нь 800 мянгаас нэг сая төгрөгийн хооронд байсан. Мөн зарим ТҮЦ бохир, стандарт хангаагүй байхыг үгүйсгэхгүй. Гэхдээ албадан буулгахаасаа өмнө ТҮЦ эрхлэгчидтэй уулзалт хийх, сонсгол явуулж хуулийн 30 хоногийн хугацаа өгөх хэрэгтэй байсан. Үнэхээр уулзаж ярилцсан бол бид бүхэн өнөөдөр ингэж явахгүй.

2025 оны хоёрдугаар сард хотын даргын А/237, А/234 гэх захирамж гарч тухайн захирамжад ТҮЦ гэдэг үг огт тусгагдаагүй байтал ТҮЦ эрхлэгчид мэдэгдэх хуудас өгч 2025 оны 4, 5, 6 сарын хооронд бүх ТҮЦ-ийг ачсан.

Хотын захирагч Х.Нямбаатар УИХ-ын индэрээс ТҮЦ эрхлэгчидтэй холбоотой хэлж байгаа бүх зүйл нь худал, үнэний оргүй үг. Яагаад гэвэл, Нарантуул, Хархорин, Их наяд худалдааны төв дээр талбай өгнө гэж мэдэгдсэн. Очоод тухайн газартай нь уулзахад нийслэлээс тийм мэдэгдэл ирээгүй гэж хэлсэн. Мөн амьжиргааны зардал, гарааны мөнгө өгсөн гэсэн нь хүртэл улс төрийн шоу байсан.

ТҮЦ эрхлэгчид ихэвчлэн тэтгэврийн насны хөгжлийн бэрхшээлтэй иргэн, өндөр настнууд байдаг. Тэд бүгд зээл авч үйлчилгээний ажил явуулж байсан. Би хүртэл зээл авч тухайн байршилд үйл ажиллагаа явуулж байтал гэнэт л ТҮЦ-ийг минь ачна гээд шууд хураагаад явсан. Өнөөдөр би тэтгэврийн зээлтэй, өртэй үлдсэн. Зээлээ төлөх бизнесийн орлогогүй болж хоцорсон. Над шиг олон хүн гадаа гудамжинд хөөгдсөн. Одоо надад 20 сая төгрөгийн зээл л үлдсэн.

Төрөөс хоёр удаа үйлчилгээ эрхлэгчдэд ТҮЦ худалдаж авах санал тавьсан. Эхний ТҮЦ-ийг өнгөрөгч 2014 онд 12-15 сая төгрөгөөр худалдаж авсан бол хоёр дахь ТҮЦ-ийг 2018 онд 9.6 саяар зарна гэхээр нь бусдаас зээл аван байж худалдаж авсан.

Бид бүхэн нийслэлээс аваарай гэсэн бүх ТҮЦ-ийг зээл, өр тавьж авсан. Нийслэлээс ТҮЦ нийлүүлсэн болохоор гайгүй байх гэж бодоод байж байтал жилийн дотор шийдвэрээ цуцалсан. Ингээд бодоход төрөөс ТҮЦ зарж, захирамж гаргасан хэрнээ жил болоод тухайн захирамжаа цуцалдаг уламжлал тогтжээ. Нийслэлд үйл ажиллагаа явуулж буй ТҮЦ эрхлэгчдийн 80 гаруй хувь нь өрх толгойлсон эмэгтэй, хөгжлийн бэрхшээлтэй иргэн, өндөр настнууд байдаг. Хууль зүйн сайдаар ажиллаж байсан хотын дарга Х.Нямбаатар өөрөө Үндсэн хуулийг шууд зөрчиж болохгүй.

Энэ сард дахин хотын даргатай уулзах төлөвтэй байгаа. Гэхдээ нийслэлээс бид бүхэнд үйл ажиллагаа эрхлэх газар санал болгосон. Тухайн байршил нь алслагдсан захын дүүрэг буюу худалдан авагч байхгүй газар талбай байсан. Жишээ нь, долоон буудлаас цааш зуслангийн бүс, Налайх явах замуудад үйл ажиллагаа эрхэлж болно гэсэн. Тийшээ явлаа гэхэд худалдан авалт байхгүй. Тэгэхээр ТҮЦ гэх үгний утга санаа хүртэл алдагдана. Саяхан хотын даргатай бид бүхэн уулзсан. Тэгээд ажлын хэсэг гарж ажиллана гэсэн. Гэвч өнөөдрийг хүртэл тогтсон мэдээлэл алга байна.