Мэргэжлийн сүмогийн Хацү башёгийн ес дэх өдрийн барилдаанууд өчигдөр/2026.01.19/ боллоо. Энэ өдөр Японы эзэн хаан Нарүхито, хатан Масако, тэдний охин гүнж Аико нар хүрэлцэн ирсэн нь онцлог байв. Башёг тэргүүлэгчид ч ээлж дараалан өвдөг шороодож, олныг гайхшруулжээ.

Ёкозүна Хошорюү С.Бямбасүрэн маэгаширагийн дөрөвдүгээрт эрэмбэтэй Атамифүжид унаж, зургаан даваа, гурван унаатай болов. Хошорюү С.Бямбасүрэн башёг тэргүүлж байсан боловч сүүлийн хоёр өдрийн барилдаанд дараалан давж чадсангүй.

Шинэ ёкозүна Оносато ч мөн өчигдөр унажээ. Залуу од комүсүби Вакамотохарү түүнийг дийлсэн аж. Ийнхүү хоёр аварга хамтдаа нэг өдөр даваа авсангүй.

Саяхан л зургаан бөх Хацү башёгийн түрүү бөхийн тоонд явж байсан бол өдгөө сэкивакэ Киришима Б.Лхагвасүрэн ганцаараа найман даваа, нэг унаатай тэргүүлж байна. Түүний араас долоон даваа, хоёр унаатай озэки Аонишики, Атамифүжи, Фүжинокава, Аби нар удаалж буй.

Сэкивакэ Киришима өчигдөр Үраг давжээ.

Бусад монгол бөхчүүдийн тухайд Тамаваши Б.Мөнх-Оргил (3-6) Ошома П.Дэлгэрбаярыг (5-4) давжээ. Харин Чиёошома Г.Мөнхсайхан (3-6), Асахакүрюү Р.Жамъянтогтох (5-4) нар өвдөг шорооджээ.