АТГ-аас өнгөрсөн долоо хоногт төрийн өндөр албан тушаалтууд ч нэрийг нь хэлж чаддаггүй “гурван үсэг”-тэй гэх компанийн авлигын хэргийг талаар мэдээлэв. Мөн Ерөнхий сайд Г.Занданшатар өнгөрсөн Бямба гариг /2025.01.17/-т телевизийн шууд эфирээр олон нийтийн асуултад хариулах үедээ эрчим хүчний салбарынхан оролцож, холбогдсон 2-3 хэргийг “томоохон” хэмээн онцолсон юм.

Тухайлбал, Зам, тээврийн яамны Төрийн нарийн бичгийн дарга Б.Насантогтохыг Эрчим хүчний яаманд газрын дарга байхдаа албан тушаалаа урвуулан ашигласан, үндэслэлгүй хөрөнгөжсөн хэргээр баривчилсан.

Б.Насантогтох Монголын “М Си Эс”, Канадын “Эрдэнэ ресурс”-ийн хамтарсан алтны төслийн бүтээн байгуулалтаас ашиг хүртсэн

Б.Насантогтоход эдийн засгийн давуу байдал олгосон гэх аж ахуйн нэгж нь Баянхөндийн алтны орд дахь баяжуулах үйлдвэрийн цахилгаан хангамжийг хариуцаж буй “М Си Эс интернэйшнл” ХХК юм. Тус компани өөрийн албан ёсны цахим хуудастаа, Баянхөндий алтны ордыг ашиглагч “Эрдэнэ монгол” ХХК-тай “Цахилгаан эрчим хүч нийлүүлэх” гэрээний хүрээнд шугам, дэд станц зэргийг 2023-2025 онд өөрийн хөрөнгөөр барьж байгуулсан гэдгийг онцолсон байна. Өөрөөр хэлбэл, АТГ-ын мэдээнд дурдсан Баянхонгор аймгийн Шинэжинст суман дахь баяжуулах үйлдвэрийн цахилгаан эрчим хүчний хангамжийн дэд бүтэц, найдвартай ажиллагааг “М Си Эс интернэйшнл” ХХК өнөөг хүртэл хариуцдаг гэсэн үг.

Тэгвэл Баянхөндий алтны орд, баяжуулах үйлдвэрийг байгуулсан “Эрдэнэ монгол” ХХК нь “М Си Эс” группийн Хонконгийн хөрөнгийн биржид бүртгэлтэй “Монголиан майнинг корпорэйшн” (ММС) болон Канадын “Эрдэнэ ресурс девелопмент корпораци”-удын 50:50 хувийн эзэмшилтэй охин юм.

Монгол Улсын хоёр дахь Ерөнхийлөгч Н.Багабандийн охин Б.Баярмаагийн Канадын хөрөнгө оруулагчидтай хамтран үүсгэн байгуулсан “Эрдэнэ ресурс” ХХК Баянхөндий алтны төслийг 2015 оноос хойш хэрэгжүүлж байгаа. Баянхонгор аймгийн Шинэнжинст суманд үйл ажиллагаа явуулдаг тус уурхайг 2024 оны нэгдүгээр сараас эхлэн  “М Си Эс ” групп хамтран эзэмших болсон.  Баянхөндийн алтны ордын батлагдсан нөөц  513,700 унц(өнөөгийн ханшаар 2.3 тэрбум ам.долларын алт). Жилд дунджаар 85,000 унц алт олборлох төлөвлөгөө танилцуулжээ.

Товчхондоо, Б.Насантогтох нь энэхүү томоохон ордыг түшиглэн байгуулсан баяжуулах үйлдвэрийн цахилгаан эрчим хүчний хангамжийн зөвшөөрлийг ганцхан өдөрт шийдвэрлэж өгсөн. Тэрхүү зүтгэлийнхээ хариуд эхнэрийнхээ компаниар 5.5 тэрбум төгрөгийн үнэ бүхий ган голтой хөнгөн цагаан дамжуулагч утсыг тус бүтээн байгуулалтад нийлүүлжээ.

Дашрамд дурдахад, “М Си Эс ” группийн эзэн Ж.Оджаргал Баянхөндий алтны ордыг эзэмшигч “Эрдэнэ монгол” болон цахилгаан эрчим хүч нийлүүлэгч гэх “М Си Эс интернэйшнл” ХХК-д хоёуланд эцсийн өмчлөгчөөр бүртгэлтэй байгаа юм.

 Б.Насантогтох эхнэрийхээ компаниар дамжуулан авлига авсныг АТГ тогтоож, “Эрдэнэ монгол” компани алтны төслөө тунхаглав

АТГ-аас Б.Насантогтохыг албан тушаалаа урвуулан ашиглаж, үндэслэлгүй хөрөнгөжсөн гэж үзэн, яллагдагчаар татаж, гэрээс их хэмжээний бэлэн валют хураан авсан. Улмаар 2023-2025 онд Эрчим хүчний яамны Эрчим хүчний бодлогын хэрэгжилтийг зохицуулах газрын даргаар ажиллаж байхдаа өөртөө илтэд эдийн засгийн давуу байдал бий болгосон гэж бууруутгаж байгаа.  Тодруулбал, 2023.11.16-нд нэр бүхий аж ахуй нэгжээс ирүүлсэн Баянхонгор аймгийн Шинэжинст сумын нутагт баригдах уул уурхайн баяжуулах үйлдвэрийн “Цахилгаан хангамжийн техникийн нөхцөл олгуулах” хүсэлтийг хэлэлцэж, тэр өдөрт нь цахилгаан хангамжийн техникийн нөхцөлийг баталсан. Б.Насантогтох дээрх техникийн нөхцөл баталснаас хойно 2024.06.20-нд өөрийн эхнэрийн үүсгэн байгуулсан нэр бүхий аж ахуйн нэгжийн нэрээр дээр дурдсан аж ахуй нэгжтэй “Ган голтой хөнгөн цагаан дамжуулагч утас нийлүүлэх” 5.5 тэрбум төгрөгийн өртөгтэй гэрээг байгуулж өөртөө давуу байдал бий болгосон гэдгийг шалгалтаар тогтоогоод байгаа юм.

Энэ хугацаанд “Эрдэнэ ресурс девелопмент корпорэйшн” болон “Эрдэнэ монгол” компаниуд Баянхөндий алтны төслийн аж үйлдвэрийн цогцолборын төслөө бүрэн ашиглалтад оруулсан гэдгээ сүр дуулиантай зарласан. Олборлолт ч төлөвлөсөн хэмжээнээс давж, амжилттай ажиллаж буйгаа хөрөнгө оруулагчдадаа тайлагнах болов.

“Эрдэнэс ресурс девелопмент корпорэйшн” нь Канадын Торонто болон Монголын хөрөнгийн биржид давхар бүртгэлтэй хувьцаат компани. Монголын хөрөнгийн биржийн мэдээллээр “Эрдэнэ ресурс девелопмент корпорэйшн” [MSE:ERDN] ХК-ийн хувьцааны нийт үнэлгээ 2025 онд 705.9 тэрбум төгрөгөөр өсөж, хөрөнгийн өсөлтөөрөө нийт компаниудыг тэргүүлсэн байна.