Монголын бурхан шашинтны төв Гандантэгчэнлин хийдийн зурхайч Ч.Очирбатаас ирж буй XVII жарны гал морин жилийн ерөнхий, төлөв байдлын талаар тодрууллаа.

Тэрбээр, энэ жил "Сүрээр дарагч" хэмээх гал морин жил гарах гэж байна. Тухайн жилийн өнгийг олон янзаар шинжиж гаргадаг. Монголчууд шороон үхрийн шинжээр тухайн жилийн өнгө болон байгаль цаг уурын шинжийг урьдчилж тодорхойлдог уламжлалтай. Энэ жилийн тухайд шороон үхрийн шинжээс харвал, залууст ээлтэй, нялхаст дунд зэрэг, хөгшдөд биеэ энхрийлүүштэй гэж зурхайд буусан. Харин байгаль цаг уурын тухайд жилийн эхээр халуун, гандуу байх бол жилийн дундуур мөн бороо хур татруу  өвс ногоо гандах байдал үргэлжлэх бөгөөд жилийн сүүлээр мөндөр, бороо элбэг байна. Өөрөөр хэлбэл, сар бүрийн сүүлээр хур бороо, мөндөр нэлээд орох төлөвтэй байгаа.

Ерөнхийдөө морь жил их буянтай, зуд турхангүй, өлсгөлөнгүй гэж зурхайд буусан нь хүн зон нийтээр тайван амгалан байх сайхан жил гарч байна гэж ойлгож болно.

Тодруулбал, үхэр хариулаач маань хөл нүцгэн хоёр гутлаа хажуудаа барьж яваагаар дүрслэгдсэн байгаа нь маш тайван амгалан байдлыг илэрхийлж байна. Дээр хэлсэн  энэ жилийн хувьд хүн зоны хувьд маш их буянтай, амгалан жил болно гэж зурхайд буусан байгаа. Сайн шинжүүд их олон байгаа" гэлээ.

Мөн энэ жил нэг цагаан мэнгэтэй жил гарч байгаа учир нэг цагаан мэнгэтэй хүмүүс мэнгэний засал хийлгэх шаардлагатай. Дээрээс нь жил нь орж байгаа хүмүүс жилийн заслаа хийлгэхийг сануулсан юм. Учир нь 13, 73-ны жил ороход жаргал, зовлон давхацдаг гэж үздэг байна. Харин 37-ны жил ороход дайсан жил орлоо гэж үздэг учир аливаа муу зүйлд өртөх, бэртэж гэмтэх эрсдэлтэй байдаг гэж зурхайн ухаанд үздэг байна.

Үүнээс гадна хулгана жилтний их харш жил, тахиа, туулай жилтний бага харш жил гарч байгаа аж. Тиймээс сүсэгтэн олон морь жил гарсны дараа өөрт тохирох засал, номоо хийлгэхийг сануулсан юм.