Хятадад төрөлтийн тоо багассаар сүүлийн дөрвөн жилд дараалан хүн амын тоо буурсан үзүүлэлттэй гарав. 2025 онд Хятадын хүн ам 1.405 тэрбум хүрсэн нь 1949 оноос хойших түүхэн доод үзүүлэлт болж байна. 1.405 тэрбум гэдэг нь өмнөх оноосоо 3.39 саяар буурсан үзүүлэлт гэдгийг Хятадын Үндэсний статистикийн хороо өнөөдөр /2026.01.19/ мэдээллээ.

2025 онд 65 ба түүнээс дээш насны хүн амын тоо 223.65 сая хүрчээ. Энэ насныхан нийт хүн амын 15.9 хувийг эзэлж байна.

Мөн онд 7.92 сая төрөлт бүртгэгдсэн нь өмнөх оноос 1.62 саяар буурсан үзүүлэлт байлаа. Гэтэл 2023 онд үүнээс хавьгүй их буюу 9.02 сая төрөлт бүртгэгдэж байсныг Хятадын хэвлэлүүд мэдээлж байна.

Төрөлт буурч, хүн ам хурдацтай хөгширч буй нь ажиллах хүчний хомсдол зэрэг асуудлуудыг үүсгэх болсон. Угтаа бол Хятад улс даруй 10 жилийн өмнө нэг хүүхдийн бодлогоо халж, айл өрхүүдийг гурав хүртэлх хүүхэдтэй болохыг зөвшөөрч эхэлсэн билээ. Шинэ бодлого төдийлөн үр дүнгээ өгөхгүй байгаа тул засгийн газраас өнгөрсөн жил нэмэлт хөтөлбөрүүдийг зарласан. Энэ хүрээнд айл өрхүүдэд гурваас доош насны хүүхэд бүрийнх нь тоогоор жилд 3600 юань буюу 500 ам.долларын тэтгэмж олгож эхэлжээ. Орон нутгийн зарим засгийн газар тусдаа өөр санаачлагууд ч гаргасан байна. Гэвч эдийн засгийн хөгжил удааширч, боловсролын зардал өсч буй нийгэмд энэ аргууд нь хэр үр дүнтэй байгааг хараахан дүгнэх аргагүй байна.