Авлигатай тэмцэх газар/АТГ/-аас  эрчим хүчний салбарын эрх бүхий албан тушаалтнуудад холбогдох хэргүүдийг мөрдөн шалгаж эхэлсэн гэдэг мэдээллийг өгсөн юм. Тодруулбал, одоогийн ДЦС-IV ТӨХК-ийн гүйцэтгэх захирал Н.Тавинбэх өмнө нь Эрчим хүчний яамны Төрийн нарийн бичгийн даргаар ажиллаж байхдаа БНСУ-ын Эксим банкны эх үүсвэртэй хөнгөлөлттэй зээлээр Монгол Улсын 10 аймагт дулааны станц барих төслийн зөвлөх үйлчилгээний 9 сая гаруй ам.долларын гэрээг байгуулсан. Ингэхдээ түүнийг албан тушаалын байдлаа урвуулан ашиглаж, зөвлөх үйлчилгээний төсвийг 2,6 сая ам.доллараар нэмж, Монголын нэр бүхий аж ахуйн нэгжид эдийн засгийн давуу байдал бий болгосон гэх хэрэгт холбогдуулан шалгаж байна. Тиймээс Н.Тавинбэхээс гадна АТГ-т шалгуулж буй эрчим хүчний салбарын бусад албан тушаалтнуудын ХОМ-ыг танилцуулъя.

"МАЛ СҮРГЭЭ 656 САЯ, 7 ГАЗРАА 29 САЯ ТӨГРӨГӨӨР ҮНЭЛЖЭЭ"

ДЦС-IV ТӨХК-ийн гүйцэтгэх захирал Н.Тавинбэх:

Н.Тавинбэх нь 2020 онд Эрчим хүчний сайдаар томилогдон ажиллахдаа АТГ-т хөрөнгө орлогоо анх мэдүүлжээ. Тэрбээр 2020-2024 онд буюу таван жил АТГ-т хөрөнгө орлогоо мэдүүлсэн юм. Хамгийн сүүлд 2024 онд Эрчим хүчний яамны Төрийн нарийн бичгийн даргын албан тушаал хашиж байхдаа дараах хөрөнгө орлогыг мэдүүлжээ. Түүний жилийн нийт орлого нь 38 сая төгрөг байна. Тэгвэл гэр бүлийн нийт гишүүдийн орлого нь 50 сая төгрөг бөгөөд хөрөнгө борлуулсны орлого нь 464 сая төгрөг гэж мэдүүлсэн байна.

Түүний нэр дээр хоёр нийтийн орон сууц, нэг баригдаж дуусаагүй барилга байгууламжтай, нийтэд нь 199 сая төгрөгөөр үнэлжээ.

Түүний хувьд автомашингүй ч 610 адуу, 480 үхэр, 1600 хонь, 300 ямаатай бөгөөд нийт мал сүргээ 656 сая төгрөгөөр үнэлсэн байна. Үүнээс гадна эзэмших эрхтэй таван газартай, өмчлөх эрхтэй хоёр газраа нийт 29 сая төгрөгөөр үнэлжээ. Мөн тэрбээр ямар нэгэн үнэт эдлэлгүй бөгөөд дотоодын банкинд 32 сая төгрөгийн хадгаламжтай, дансандаа 225 сая төгрөгийн бэлэн мөнгөтэй гэж мэдүүлсэн байна. Харин 147 сая төгрөгийн зээлийн үлдэгдэлтэй гэж хөрөнгө орлогын мэдүүлэгтээ мэдүүлснээс хойш нэг жил гаруй хугацаа өнгөрчээ. Тэрбээр "Разно импекс нэгдэл" компанид хөрөнгө оруулалт хийсэн байна.

"15 ХУРДАН УДМЫН АДУУТАЙ БӨГӨӨД 150 САЯ ТӨГРӨГӨӨР ҮНЭЛЖЭЭ"

 Эрчим хүчний сайдын зөвлөх асан П.Товуудорж:

АТГ-ын мэдээлснээр мөрдөн шалгах ажиллагааны явцад зөвлөх үйлчилгээ үзүүлэгч Монголын нэр бүхий аж ахуйн нэгж нь Н.Тавинбэхийг Эрчим хүчний сайдаар ажиллаж байхад нь түүний зөвлөхөөр ажиллаж байсан иргэн П.Товуудоржийн үүсгэн байгуулсан компани болох нь тогтоогдсон гэсэн юм.

П.Товуудорж нь 2020 онд Эрчим хүчний сайдын зөвлөхөөр ажиллахдаа АТГ-т хөрөнгө орлогоо анх мэдүүлжээ. Тэрбээр 2020-2024 онд буюу таван жил АТГ-т хөрөнгө орлогоо мэдүүлсэн бөгөөд 2024 онд зохицуулагчаар ажиллах үеэрээ дараах хөрөнгө орлогыг мэдүүлжээ. Түүний жилийн нийт орлого нь 194 сая төгрөг байна. Тэгвэл гэр бүлийн нийт гишүүдийн орлого нь 78 сая төгрөг гэж мэдүүлсэн байна.

Түүний нэр дээр нэг нийтийн орон сууц, нэг үйлчилгээний зориулалттай барилга байгууламжтай гэж мэдүүлсэн бөгөөд нийтэд нь 424 сая төгрөгөөр үнэлжээ.

"Lexus, ES-300" маркийн суудлын жижиг автомашинаа 45 сая төгрөгөөр үнэлсэн байна. Үүнээс гадна 15 хурдан удмын адуутай бөгөөд 150 сая төгрөгөөр үнэлжээ. Мөн дотоодын банкинд 496 сая төгрөгийн хадгаламжтай, 34 сая төгрөгийн зээлтэй. Тэрбээр "Найманд партнерс" компанид хөрөнгө оруулалт хийсэн байна.

"БАНКИНД 291 САЯ ХАДГАЛАМЖТАЙ, 180 САЯ АВЛАГАТАЙ, 200 САЯ ТӨГРӨГИЙН ЗЭЭЛТЭЙ"

Эрчим хүчний яамны газрын дарга асан Б.Насантогтох:

-Эрчим хүчний сайдын зөвлөх асан Б.Насантогтох нь Эрчим хүчний яамны Бодлогын хэрэгжилтийг зохицуулах газрын даргаар ажиллаж байхдаа 2023 оны арваннэгдүгээр сарын 16-ны өдөр нэр бүхий аж ахуйн нэгжээс ирүүлсэн Баянхонгор аймгийн Шинэжинст сумын нутагт баригдах уул уурхайн баяжуулах үйлдвэрийн цахилгаан хангамжийн техникийн нөхцөл олгуулах хүсэлтийг хэлэлцэж, тухайн өдрөө цахилгаан хангамжийн техникийн нөхцөлийг баталсан байна.

Хэрэг мөрдөн шалгах явцад Б.Насантогтох нь дээрх техникийн нөхцөл баталснаас хойно 2024 оны зургадугаар сарын 20-ны өдөр өөрийн эхнэрийн үүсгэн байгуулсан нэр бүхий аж ахуйн нэгжийн нэрээр дээр дурдсан аж ахуйн нэгжтэй ган голтой хөнгөн цагаан дамжуулагч утас нийлүүлэх 5,5 тэрбум төгрөгийн өртөгтэй гэрээг байгуулж, өөртөө давуу байдал бий болгосон. Мөн түүний гэрт хийсэн нэгжлэгээр 10.600 ам.доллар, 11.600 юань, 300 мянган вонн, 3440 евро, хамаарал бүхий этгээдийнх нь гэрээс 70 мянган ам.доллар буюу нийт 350 орчим сая төгрөг илэрсэн гэдгийг АТГ-аас мэдээлсэн. Энэ их хэмжээний мөнгөний эх үүсвэрийг тогтоохоор мөрдөн шалгаж байгааг албаныхан онцолсон юм.

Б.Насантогтох нь 2020-2021 онд Эрчим хүчний яамны Төрийн нарийн бичгийн даргаар, 2022-2024 онд яамны газрын даргын албан тушаалаар АТГ-т хөрөнгө орлогоо мэдүүлжээ. Түүний жилийн нийт орлого нь 69 сая төгрөг байна. Тэгвэл гэр бүлийн нийт гишүүдийн орлого нь 57 сая төгрөг аж.

Хоёр нийтийн орон сууцтай гэж мэдүүлсэн бөгөөд нийтэд нь 582 сая төгрөгөөр үнэлжээ.

Түүний хувьд автомашингүй бөгөөд 140 хонь, 56 үхрээ нийтэд нь 49 сая төгрөгөөр үнэлсэн байна. Мөн эзэмших эрхтэй хоёр газраа дөрвөн сая төгрөгөөр үнэлжээ. Үүнээс гадна тэрбээр дотоодын банкинд 291 сая төгрөгийн хадгаламжтай, 180 сая төгрөгийн авлагатай, 200 сая төгрөгийн зээлтэй гэж мэдүүлсэн байна. Тэрбээр "Эн Ар Жи хөгжил" компанид хөрөнгө оруулалт хийсэн байна.