Польшийн хилийн хамгаалалтын албаны мэдээлснээр, өнгөрсөн оны сүүлийн дөрвөн сарын хугацаанд 18–22 насны ойролцоогоор 156 мянган эрэгтэй Украинаас Польш руу нэвтэрчээ. Уг тоо нь нийт давхардсан нэвтрэлтийн тоо болохыг онцолсон бөгөөд нэг хүн хилээр хэд хэдэн удаа орж гарсан байх боломжтойг тайлбарлав.

Залуу эрэгтэйчүүдийн хил давсан энэ хөдөлгөөн нь Украины засгийн газар өнгөрсөн наймдугаар сарын сүүлчээс эхлэн тухайн насны эрэгтэйчүүдийг гадаад улс руу зорчихыг зөвшөөрсөн шийдвэрийн дараа гарчээ. Үүнээс өмнө Оросын Украинд халдсантай холбогдуулан Киев 18–60 насны ихэнх эрэгтэйчүүдийг эх орноосоо гарахыг хориглож байсан юм.

Засгийн газрын тайлбарласнаар, энэхүү хоригийг зөөлрүүлсэн нь залуучуудад гадаадад суралцах боломж олгож, улмаар ирээдүйд Украины хөгжилд хувь нэмэр оруулах зорилготой аж.

Гэсэн хэдий ч Украины хүн ам зүйн асуудлын шинжээч Олександр Хладун уг арга хэмжээ нь тус улсын хүн ам зүй болон эдийн засгийн чадавхыг сулруулж байна гэж анхааруулжээ. Тэрбээр зарим залуус ирээдүйд эх орондоо буцаж ирэх магадлалтай ч яг хэд нь эргэж ирэх нь тодорхойгүй байгааг онцлон, энэ байдал нь улсын ирээдүйд ноцтой үр дагавар авчирч болзошгүй хэмээн сэрэмжлүүлсэн байна.