Оросын довтолгоо Украины эрчим хүчний байгууламжуудыг тасралтгүй онилж байна. Үүнтэй холбоотойгоор Украин бусад орнуудаас тусламж хүсч байна. Тус улсын ерөнхийлөгч Володимир Зеленский агаарын довтолгооноос хамгаалах систем нэн яаралтай хэрэгтэй байгааг онцолж, цахилгаан станц болон дэд бүтцийг хамгаалах шаардлагатай гэж мэдэгдэв.

Тэрбээр эрчим хүчний салбарт онц байдал зарлаж, улсын цахилгаан эрчим хүчний хэрэгцээний 40 хувийг хангаж чадахгүй байдалд хүрснийг мэдэгдлээ.

Мөн эрчим хүчний хямралын улмаас нийслэл Киев хотын захирагч Виталий Кличко сургуулиудыг хоёрдугаар сарын 1 хүртэл хаалттай байлгахаар болсныг зарласан байна. Зеленский Орос улс шинэ, өргөн хүрээтэй довтолгоо бэлтгэж байгааг анхааруулж, пуужин, дроны халдлагыг зогсооход агаарын довтолгооноос хамгаалах систем зайлшгүй шаардлагатай гэдгийг хэллээ. Мөн Украинд эрс хүйтэн цаг агаар үргэлжилж, өдрийн температур цельсийн хасах 10 градус хүртэл буурч байгаа нь цахилгааны хомсдолыг улам хүндрүүлж байна.

Үүний зэрэгцээ Украины төлөөлөгчид АНУ-д айлчилж, нөхцөл байдлын талаар хэлэлцээ хийж байна. Ерөнхийлөгчийн Тамгын газрын дарга Кирилл Будановын мэдээлснээр, төлөөлөгчид АНУ-ын төлөөлөгчидтэй уулзан Оросын довтолгооны бодит нөхцөл байдал, учруулж буй хохирлыг дэлгэрэнгүй тайлбарлах юм. Төлөөлөгчдийн бүрэлдэхүүнд Кирилл Буданов болон Украины үндэсний аюулгүй байдал, батлан хамгаалах зөвлөлийн нарийн бичгийн дарга Рустем Умеров багтжээ. АНУ-ын талаас тусгай элч Стив Уиткофф болон Жаред Кушнер төлөөлж байна.

Ерөнхийлөгч Зеленский өчигдөр (2026.01.17) хийсэн видео мэдэгдэлдээ, АНУ-д бодит, үнэн зөв мэдээлэл хүргэх нь төлөөлөгчдийн гол зорилго гэдгийг хэлэв. Тэрбээр Оросын довтолгоо нь хэлэлцээ хийх боломжийг байнга сулруулж байгааг онцолж, Америкийн талыг ойлгохыг хүсчээ. Оросын цохилтууд эрчим хүчний дэд бүтцийг ихээр сүйтгэснээс Украин цахилгаан эрчим хүчний ноцтой хүндрэлтэй тулгарч байгаа бөгөөд Зеленский ойрын хугацаанд эрчим хүчний импортыг нэмэгдүүлэхээр төлөвлөж байгаагаа мэдэгдэв.