Баян залууг дорд үзэж эсвэл зүсээ хувилгасан мафийн босс, мэргэжлийн алуурчинг хэн нэгэн үл хүндэтгэж буй богино кино таны "Facebook" болон "Instagram" дээр үе, үе гарч ирээд яг эгзэгтэй мөчид дээрээ дуусчиж байгаа биз.

Тэгвэл дэлхийн дижитал контентын ертөнцөд тэрхүү Хятадын богино хэмжээний драм (микро-драм) болон вэб зохиол чимээгүй хувьсгал хийж байна. Гар утасны дэлгэцээр хязгаарлагдах микро-драмуудын богино ангитай цувралуудаас эхлээд олон мянган бүлэгтэй вэб зохиол хүртэл өргөн цар хүрээг хамарч, дэлхий нийтийг соронз мэт татаж буй.

Уламжлалт кино, телевизийн контентоос ялгаатай нь эдгээр богино драмууд гар утас хэрэглэгчдийн өдөр тутмын хэрэглээнд тохирохуйц 1–2 минутын богино үзэгдлүүдтэй бөгөөд уянгын түүх, сонирхолтой үйл явдал, амар хялбар үзэх боломжтой форматаараа алдартай болж буй.

Шинэ соёлын брэнд

Хятадын "Netcasting Services Association"-ийн судалгаагаар 2025 оны эхний найман сард Хятадын богино драмын гаднын зах зээлээс олсон орлого 1.525 тэрбум ам.долларт хүрч, өмнөх оны мөн үетэй харьцуулахад 194.9 хувиар өсжээ. Үүний зэрэгцээ эдгээр контентыг татсан апп таталтууд 730 сая давсан нь 370.4 хувийн өсөлттэй байв. Мөн орлогоороо тэргүүлсэн тоо хэмжээний топ 20 апп-ын бараг 90 хувь нь Хятадын оролцоотой платформууд байна гэж мэдээлжээ.

ReelShort — амжилтын нэг жишээ

Эдгээр платформуудаас "ReelShort" нь үнэхээр онцгой амжилт үзүүлжээ. Энэ апп платформ АНУ-ын "App Store"-ын энтертайнмент ангилалд тогтмол дээгүүр байр эзэлж, "TikTok" ба "Netflix"-ийг хүртэл ардаа үлдээн нийт рейтингээрээ тэргүүн байр эзэлсэн удаатай. Түүнчлэн "ReelShort"-ын "The Double Life of My Billionaire Husband" хэмээх жүжиг нь 480 сая гаруй үзэлттэй болж, тухайн үедээ "Netflix"-ийн "Squid Game"-ээс олон үзэлттэй байсан гэж зарим хэвлэл бичжээ.

"The Economist" сэтгүүл ч үүнийг товчхон “Америкийг эзэлж буй Хятадын дараагийн экспорт” хэмээн нэрлэсэн нь энэ дижитал соёлын бүтээгдэхүүний цар хүрээг харуулж байна.

Мөн Хятадын онлайн вэб зохиол нь дэлхий даяар уншигчидтай болж олон хэл дээр орчуулагдаж байгаа бөгөөд энэ нь зөвхөн дижитал контент төдийгүй соёлын харилцан ойлголцлын шинэ сувгийг нээж өгч байгаа гэнэ.

Эдгээр богино драм, вэб зохиол нь уламжлалт урт, уйтгартай контентын хажууд богино хэдий ч хурдан өрнөлтэй, сонирхолтой түүх хэлбэрээр олон улсын хэрэглэгчдэд хялбархан хүрч байгаа нь амжилтын гол шалтгаан болжээ.