АНУ-ын ерөнхийлөгч Дональд Трамп Гренландыг эзэмших төлөвлөгөөг нь эсэргүүцсэн Дани болон бусад Европын долоон орны эсрэг тариф тогтоох шийдвэр гаргасан байна. Трамп Данийн мэдэлд байдаг Гренланд нь АНУ-ын үндэсний аюулгүй байдалд чухал нөлөөтэй гэж удаа дараа мэдэгдэж байна. Мөн өөрийн төлөөлөгчдөө ч хэлэлцээ хийлгэх гэж илгээсэн. Харин Дани улс үүнийг маш хүчтэй эсэргүүцэн, шүүмжилж буй.

Улмаар Дани тэргүүтэй долоон орны АНУ-д илгээх бүх төрлийн импортод 10 хувийн тариф тогтоож буйгаа Трамп өчигдөр (2026.01.17) мэдэгдэв.

Энэ нь хоёрдугаар сарын 1-нээс эхлэн хэрэгжих бөгөөд Их Британи, Франц, Герман зэрэг оронд хэрэгжих юм. Мөн зургадугаар сарын 1-нээс эхлэн энэ тариф нь 25 хувь болж өснө гэдгийг анхаарууллаа. Шинжээчдийн үзэж буйгаар, шинэ тариф нь өмнө нь хэрэгжиж байсан тариф дээр нэмэгдэж байгаа бололтой. Трамп өөрийн цахим хуудаснаа бичихдээ, "Энэхүү тариф нь Гренландыг бүрэн авах хэлэлцээрт хүрэх хүртэл хүчинтэй бөгөөд тэд төлсөөр байх болно" гэжээ. Ямар учир шалтгааны улмаас болохыг тодруулахдаа, эдгээр тарифт орсон улс орнууд үл мэдэгдэх шалтгаанаар Гренланд руу цэрэг илгээсэнд гэж тайлбарлаж байна. Тэрбээр " Энэ бол манай гаригийн аюулгүй байдал, хамгаалалт, оршин тогтнолд маш аюултай нөхцөл байдал юм" гэж нэмж тэмдэглэсэн байна.

Европын удирдагчид Трампын мэдэгдэл болон тарифын заналхийллийг эрс шүүмжиллээ. Данийн гадаад хэргийн сайд Ларс Лёкке Расмуссен Трампын мэдэгдэл гэнэтийн байсан гэж хэлэв. Тэрбээр Гренландад цэргийн оролцоог нэмэгдүүлсэн нь Арктикийн бүсийн аюулгүй байдлыг сайжруулах зорилготой бөгөөд энэ бүс нутаг цаашид нам тайван байхаа больсон гэдгийг онцоллоо. Мөн энэ асуудлаар АНУ-тай хамтран илүү их ажиллах шаардлагатай гэдэгтэй санал нийлж байгаагаа илэрхийлэв.

Их Британийн ерөнхий сайд Кир Стармер НАТО-гийн хамтын аюулгүй байдлыг хангахын төлөө ажиллаж буй холбоотнуудад тариф ногдуулах нь буруу гэж мэдэгдэв. Тэрбээр уг асуудлыг АНУ-ын засаг захиргаатай шууд хэлэлцэнэ гэжээ.

Францын ерөнхийлөгч Эммануэль Макрон аливаа заналхийлэл, шахалт нь Украин, Гренланд эсвэл дэлхийн аль ч хэсэгт Европын байр сууринд нөлөөлж чадахгүй гэж олон нийтийн сүлжээнд бичив. Тэрбээр тарифын заналхийллийг хүлээн зөвшөөрөхгүй гэж мэдэгдээд, хэрэгжвэл европчууд нэгдсэн, уялдаа холбоотой хариу өгнө гэдгийг онцоллоо.

Европын комиссын ерөнхийлөгч Урсула фон дер Ляйен болон Европын зөвлөлийн ерөнхийлөгч Антонио Коста хамтарсан мэдэгдэл гаргаж, тариф нь Европ болон АНУ-ын харилцаанд сөргөөр нөлөөлнө гэж анхааруулав. Тэд Европ нэгдмэл хэвээр байж, бүрэн эрхт байдлаа хамгаална гэж мэдэгдлээ.