Мэргэжлийн сүмогийн Хацү башёгийн долоо дахь өдрийн барилдаанууд өчигдөр/2026.01.17/ Токио хотноо болов. Башёг тэргүүлж байсан Аби өвдөг шороодож, ёкозүна Хошорюү С.Бямбасүрэн болон Оносато нар давснаар хамтдаа башёг тэргүүлж эхэллээ.

Рёогокү Кокүгикан ордонд ёкозүна Хошорюү С.Бямбасүрэн маэгаширагийн гуравдугаарт эрэмбэтэй Хакүнофүжитай хоёр удаа барилдав. Эхний барилдаан дээр хоёр бөх хоёулаа зэрэг дэвжээнээс гарч, хайнцсан гэж үзсэн. Улмаар дахин барилдаж, Хошорюү давжээ. Ингэснээр тэрбээр зургаан даваа, нэг унаатай болов.

Харин ёкозүна Оносато Дайэйшог давж, мөн зургаан даваа, нэг унаатай болжээ. Тэгвэл шинэхэн озэки, Украины Аонишики энэ башёд тун тааруу барилдаж буй Вакамотохарүг төвөггүйхэн илүүрхэж, хоёр ёкозүнагийн хамтаар тэргүүлж байна.

Озэки цолоо эргүүлэн авахаар зорьж буй сэкивакэ Киришима Б.Лхагвасүрэнгийн хувьд сүүлийн дөрвөн барилдаандаа ялаад байсан Ёшинофүжиг давж, ялалтын цувралыг нь зогсоов. Тэрбээр мөн зургаан даваа, нэг унаатай башёг тэргүүлэгчдийн эгнээнд явна.

Башёг нэг ч унаагүй ганцаараа тэргүүлж байсан Аби өчигдөр озэки асан Асанояамад ялагдлаа. Цагтаа дараагийн ёкозүна гэгдэж байсан Асанояама сахилга батгүй байдлаасаа болон бэртэл гэмтлийн улмаас дөрөвдүгээр зэрэглэлийн санданмэ зиндаа руу хоёр ч удаа унаж, эргэн дээд зиндаандаа дэвшсэн нь гайхалтай.

Ийнхүү зургаан даваа, нэг унаатай ёкозүна Хошорюү С.Бямбасүрэн, ёкозүна Оносато, сэкивакэ Киришима Б.Лхагвасүрэн, Аби зэрэг бөхчүүд башёг тэргүүлж байна.