ОХУ-ын ерөнхийлөгч Путин Баасан гаригт /2026.01.16/ Иран, Израилийн удирдагчидтай утсаар ярьжээ. Иранд эсэргүүцлийн жагсаал өрнөж, ерөнхийлөгч Дональд Трамп агаарын цохилтоор сүрдүүлж, Ойрхи Дорнод үймээн бужигнаантай байгаа энэ үед Путин анх удаа ил тодоор санаа бодлоо илэрхийлсэн нь энэ байв.

Иранд өнгөрсөн сарын сүүл үеэс хойш инфляцийн өсөлтөөс үүдэлтэй эсэргүүцлийн жагсаал өрнөсөн. Эрх баригчид жагсагчдыг дарахын тулд улс орон даяар интернетийг тасалсан бөгөөд өнөөдрийг хүртэл дор хаяж 2677 хүн нас барсан гэх тоо баримт байна. Трамп Ираны ард иргэдэд туслах тухай сүүлийн хэдэн өдөр ярьсан. Хэрвээ жагсагчдад хүч хэрэглэн түрэмгийлж эхэлбэл АНУ-ын цэргүүд бэлэн байдалд байгааг тэр сануулсан билээ.

Путин Ираны ерөнхийлөгч Масуд Пезешкянтай ярихдаа Вашингтон, Тегераны хоорондох хурцадмал байдлыг намжаахын тулд хүчин чармайлт гаргасаар байгаагаа илэрхийлжээ. Ярианы дэлгэрэнгүйг хараахан мэдээлээгүй байгаа ч "Энэ бол зөвхөн Иран бус бүс нутгийн тогтвортой байдал, энх тайвны үйл хэрэгт үзүүлж буй тусламж" гэдгийг Кремлийн хэвлэлийн төлөөлөгч Дмитрий Песков хэлжээ.

Харин Израилийн ерөнхий сайд Беньямин Нетаньяхутай ярих үеэр тэд бүс нутгийг тогтвортой, аюулгүй байлгах улс төрийн болон дипломат хүчин чармайлтыг нэмэгдүүлэх тухай хэлэлцсэн байна. ОХУ зуучлалын хүчин чармайлтаа үргэлжлүүлэх, сонирхсон бүх улс орныг бүтээлч яриа хэлэлцээнд оролцохыг дэмжихэд бэлэн байгаагаа илэрхийлжээ.

Дашрамд дурдахад, Путин Оросын холбоотон болох Иран, Венесуэлийн асуудлууд дээр огт ам нээгээгүй. Гэвч тус хоёр улс аль аль нь сүүлийн үед Трампын засаг захиргааны дарамт, сүрдүүлэг дор байгаа юм.