АНУ-ын Тагнуулын төв газрын дарга Жон Ратклифф Пүрэв гаригт /2026.01.15/ Венесуэлийн нийслэл Каракаст айлчилж, тус улсын түр ерөнхийлөгч Делси Родригестэй уулзжээ. Айлчлалын үеэр тэд эдийн засгийн хамтын ажиллагааны боломжуудыг хэлэлцсэн байна. Мөн Венесуэль улс цаашид Америкийн өрсөлдөгчид, ялангуяа хар тамхины наймаачдад аюулгүй газар байхаа больсон гэдгийг Жон Ратклифф хэлжээ.

АНУ-ын албан тушаалтны хэлснээр, Ратклифф энэ долоо хоногт Родригестэй уулзсан нь итгэлцлийг бий болгох зорилготой байсан аж.

Трампын хувьд Венесуэлийн сөрөг хүчин Мариа Корина Мачадог бодвол Делси Родригесийг дэмжих хандлагатай байдаг. Гэхдээ Мачадо мөн өдөр Цагаан ордонд айлчлахдаа түүнд Нобелийн энх тайвны шагналын медалиа бэлэглэсэн билээ.

Трампын засаг захиргаа Мадурог баривчилсныхаа дараа энэ алхамаараа дэглэмийг өөрчлөх гээгүй гэж мэдэгдсэн аж. Өөрөөр хэлбэл, Венесуэлийн засгийн газар бүрэн бүтэн хэвээрээ байгаа, дэглэмийг дэд ерөнхийлөгч Родригес удирдаж байгаа гэж хэлснийг эх сурвалж мэдээлжээ. Мачадогийн оронд Родригесийг дэмжих бодлогын шийдвэр нь Тагнуулын төв газрын дүн шинжилгээтэй холбоотой бололтой.

Тагнуулын төв газар Мадурогийн баривчилгаанд ч оролцсон. Тус агентлаг өнгөрсөн оны наймдугаар сард Мадурог мөшгих жижиг багийг Венесуэльд байршуулсан аж.