Өмнөд Солонгосын нийслэл Сөүл хотын өмнөд хэсгийн хороололд гал гарсны улмаас 200 орчим хүн орон гэрээ орхин дүрвэхэд хүрчээ. Одоогоор хүн бэртэж гэмтсэн мэдээлэл алга байна.

Албаныхны мэдээлснээр, гал түймэр Баасан гаригийн /2026.01.16/ 05:00 цагт гарсан бөгөөд гал сөнөөгчид найман цаг орчим тэмцсэний эцэст галыг унтрааж чаджээ. Гал асар хурдтай тархсан тул 258 хүн дүрвэсэн. Эндээс 180 орчим хүн нь орон гэргүй болсон. Хотын захиргаанаас тэдгээр хүмүүст зориулж дунд сургуулийн барилгыг түр хоргодох байр болгон гаргаад байна.

Галын дуудлагын дагуу 1258 гал сөнөөгч 106 машин, тоног төхөөрөмжтэй ажиллажээ.

Албаныхан галын шалтгааныг тогтоохоор ажиллаж байгаа юм. Ойр хавийн сууцнууд шатамхай материалаас бүтсэн байсан нь гал амархан тархах нөхцөл болсон бололтой.

Гал гарсан Гүрён орчимд ихэвчлэн орлого багатай хүн ам амьдардаг. Тус тосгон нь Өмнөд Солонгосын хамгийн үнэтэй үл хөдлөхүүдийн төвлөрөл болсон Ганнам дүүргийн захад байрлана. 1980-аад онд хот хөгжүүлэлтийн төслөөс болоод орлого багатай хүн ам төвөөс дүрвэснээр тус тосгон үүссэн гэдэг. Уг тосгоныг Ганнам дүүрэгт үлдсэн сүүлчийн ядуусын хороолол гэдэг бөгөөд удахгүй дахин төлөвлөлтийн ажил хүлээгдэж байгаа аж.