Европын холбоо болон НАТО-гийн гишүүн орнууд Гренланд руу цэрэг, нисэх онгоц, тэнгисийн цэргийн хөлөг онгоц илгээж эхэллээ. Энэ нь Арктикийн бүс нутаг дахь аюулгүй байдлыг бэхжүүлэх, мөн сүүлийн үед үүсээд буй геополитикийн хурцадмал байдалд хариу үзүүлэх зорилготой алхам гэж албаны эх сурвалжууд мэдээлэв. Тодруулбал, Франц, Герман, Их Британи, Швед, Норвеги, Финланд, Нидерланд зэрэг НАТО-гийн орнууд Гренланд руу цэргийн жижиг бүрэлдэхүүнүүдээ илгээж эхлээд байна.

Энэ нь Дани улсын удирдсан “Арктик тэсвэр хатуужил” нэртэй хамтарсан сургуулилтын нэг хэсэг бөгөөд туйлын хатуу уур амьсгалтай орчинд хамтын ажиллагаа, бэлэн байдлыг сайжруулах зорилготой.

Мөн энэ хүрээнд Дани улс НАТО-гийн тогтмол оролцоог Гренландад бий болгохоор төлөвлөж байгаагаа мэдэгдэж байна. Ингэснээр хуурай замын цэрэг, нисэх хүчний нэгж, мөн Арктикт ажиллах боломжтой тэнгисийн цэргийн хөлөг онгоцнуудын сургуулилтыг Гренландад хэрэгжүүлэх аж. Цэргийн сургуулилт нь АНУ, Дани, Гренландын хооронд Вашингтонд болсон уулзалтын дараахан явагдаж байна. АНУ-ын зарим улс төрийн зүтгэлтнүүд Гренландын ирээдүйн статус, аюулгүй байдлын талаар маргаантай мэдэгдэл хийсэн. Улмаар Дани болон Гренландын засгийн газраас хүчтэй эсэргүүцэлтэй тулгарсан юм.

Москвагийн удирдлага НАТО-гийн Арктик дахь идэвхжилтийг шүүмжилж, Орос болон Хятадыг заналхийлэл мэтээр дүрслэн үзүүлэх нь хэтрүүлэг гэж мэдэгдэв.

АНУ-ын Цагаан ордон Европын цэргийн байршуулалт нь Америкийн стратегийн ашиг сонирхолд нөлөөлөхгүй хэмээн байр сууриа илэрхийлсэн нь холбоотнуудын хооронд ч тодорхой санал зөрөлдөөн байгааг харуулж байна. Нарийвчилсан мэдээлэл бүрэн ил болоогүй ч Дани улс мөстэй тэнгист ажиллагаа явуулах чадвартай тэнгисийн хөлөг онгоцнууд болон холбоотнуудын агаар, далайн батлан хамгаалах хүчин оролцож байгааг баталжээ. Үүнд Гренландын орчимд өмнө нь үүрэг гүйцэтгэж байсан Данийн эргүүлийн хөлөг онгоцнууд багтаж байх магадлалтай.