Хонгконгийн Тай По дүүрэг дэх орон сууцны хороололд өнгөрсөн оны арваннэгдүгээр сарын 26-нд гал гарч, сүүлийн 30 жилд тохиогоогүй гамшиг нүүрлэсэн. Аймшигт гал түймрийн улмаас нас барагсдын тоог 168 гэж эцэслэн тогтоосныг Хонгконгийн цагдаагийн газар мэдээллээ. Албаныхан цогцос таних ажиллагааг бүрэн гүйцэтгэж дууссан тул эцсийн тоог гаргасан нь энэ юм.

Цагдаагийн мэдэгдэлд дурдсанаар, хохирогчид зургаан сартайгаас 98 настай хүртэл хүмүүс байжээ. Тэдний 58 нь эрэгтэй, 110 нь эмэгтэй байсан. Мөн олонх нь тус орон сууцанд олон жил амьдарсан хөгшчүүл байсан аж. Оршин суугчдаас гадна барилгын ажил хийж байсан ажилчид мөн амиа алдсан. Нийт 10 гадаад ажилчин байсны ес нь индонези, нэг нь филиппин хүн байжээ.

Гал түймэртэй холбоотойгоор 30 гаруй хүнийг баривчилсан. Тэднийг авлига, залилан болон хүн амины хэрэгт буруутгасныг хотын дарга Жон Ли мэдээлэв. Хэргийн мөрдөн байцаалт хараахан дуусаагүй үргэлжилсээр байна.

Зүүн хойд нутгийн Тай По дүүрэгт 1980-аад онд баригдсан тус хороололд 4600 орчим хүн амьдардаг гэж 2021 онд тооцоолсон байдаг. Оршин суугчдын 40 орчим хувь нь 65 буюу түүнээс дээш насныхан аж.