Венесуэлийн сөрөг хүчний удирдагч Мариа Корина Мачадо Пүрэв гаригт /2026.01.15/ Цагаан ордон дахь уулзалтынхаа үеэр АНУ-ын ерөнхийлөгч Дональд Трампад Нобелийн шагналаа бэлэглэжээ. Тэд анх удаа биечлэн уулзсан нь энэ байв. Мачадо энэ уулзалтын дараа "Өнөөдөр венесуэльчүүдийн хувьд түүхэн өдөр боллоо. Бид ерөнхийлөгч Трампад найдаж болно. Би түүнд Нобелийн энх тайвны шагналаа бэлэглэсэн. Энэ бол бидний эрх чөлөөний төлөөх түүний өвөрмөц үүрэг амлалтыг хүлээн зөвшөөрсөн явдал юм" гэжээ.

Трамп түүнд талархлаа илэрхийлэхдээ "Энэ үйлдэл нь харилцан хүндлэлийн гайхалтай илэрхийлэл байлаа" гэв.

Мачадог Венесуэлийн шинэ удирдагчаар томилох санааг Трамп дэмжээгүй. Харин оронд нь дэд ерөнхийлөгч Делси Родригестэй харилцаа тогтоосон юм. Гэхдээ Мачадотой уулзсаныгаа Трамп "нэр төрийн хэрэг байлаа" гэж хэлээд, түүнийг "асар ихийг үзэж туулсан гайхамшигтай эмэгтэй" гэж тодорхойлжээ.

Трамп өөрийгөө Нобелийн шагнал хүртэх эрхтэй хүн гэж ярьдаг. Тиймдээ ч Мачадог Нобелийн шагнал хүртэхэд төдийлөн таатай хүлээж аваагүй. Мачадо өнгөрсөн долоо хоногт шагналаа Трамптай хуваана гэсэн боловч Нобелийн шагналын хороо тийм боломжгүй гэдгийг мэдэгдсэн билээ. Медалийн эзэмшигчийг сольж болох ч гэлээ тухайн хүний Нобелийн шагналтан гэсэн цол өөрчлөгдөхгүй.

Америкийн хувьсгалт дайнд тулалдсан Маркиз де Лафайетт орчин үеийн Венесуэлийг үндэслэгчдийн нэг Симон Боливарт Жорж Вашингтоны зурагтай медалийг бэлэглэж байсан түүхэн үйл явдлыг Мачадо энэ үеэр дурсжээ. Энэ бэлгийг бурангуй дэглэмийн эсрэг тэмцсэн АНУ, Венесуэль хоёр улсын ахан дүүгийн харилцааны бэлгэдэл байсан гэж тэр хэлэв.