Малайзын нийслэл Куала Лумпур дахь АНУ-ын Элчин сайдын яам Олон улсын сансрын станцаас 2016 онд авсан нэгэн зургийг саяхан нийтэлжээ. Тус зурагт Малайзын тэнгэрт цахилгаан цахиж буйг харуулсан байв. Зургийн тайлбар хэсэгт "Малайз хэзээ ч ийм цахилгаанжсан харагдаж байсангүй. Энэ тод гялбаа бол хотын гэрэл биш. Шуурганы үүл дундуур цахиж буй цахилгаан. Үүнийг өөр өнцгөөс харахгүй л бол та бид энэ дэлхий дээр амьдарч, амьсгалж буйгаа хялбархан мартах биз. Та шуурганы дээр байна уу, доор байна уу хамаагүй, энэ үзэмж ер бусын юм" гэж бичжээ.

Энэхүү гэм хоргүй мэт зураг, тайлбар Малайзын ард иргэдийн дунд янз бүрээр яригдав. Малайзчууд Венесуэль ажиллагаатай холбогдуулан хошигнож, "Бидэнд газрын тос байхгүй" гэжээ. Өөрөөр хэлбэл, Малайзыг дараагийн бай болгох вий гэсэн болгоомжлол тэдний хошигнолоос харагдах аж.

Фэйсбүүк дээр "Бидэнд газрын тос байхгүй гэдгийг ерөнхийлөгчдөө хэлээрэй, гуйя. Бидэнд хоол хийдэг Сажи тос л байгаа" гэх сэтгэгдэл хамгийн их хандалт авчээ.

Цаашилбал, "Та бүхний харж байгаачлан бид ширэнгэн ой дунд амьдардаг. Бид дулаацахын тулд гал түлдэг", "Манайд хот гэж байхгүй. Бид модон дунд л амьдардаг. Бидэнд газрын тос байхгүй", "Хүндэт Трамп ерөнхийлөгч өө, бид ширэнгэн ойд амьдардаг. Газрын тос байхгүй, бар, матар л байгаа", "Бидэнд газрын тос бус далдуу модны тос, аадар бороо л элбэг байна", "Бид дараагийн Венесуэль болох юм уу?", "Та Бруней юм уу Сингапурыг сонговол дээргүй юу?", "АНУ-ын Элчин сайдын яам ямар ч анхааруулгагүйгээр Малайзын хиймэл дагуулын зургийг нийтэлсэн нь үнэхээр хачирхалтай юм" гэх зэргээр малайзчууд хоржоонтэй, егөөтэй сэтгэгдлүүд бичжээ.