АНУ-ын ерөнхийлөгч Дональд Трамп "Reuters" агентлагт мэдээлэхдээ "Орос биш Украин л энхийн хэлэлцээг гацааж байна" гэжээ. Европын холбоотнууд Оросыг энхийн хэлэлцээ байгуулах сонирхолгүй байна гэж мэдэгддэг бол Трамп тэднээс эрс өөр мэдэгдэл хийлээ. Тэрбээр "Оросын ерөнхийлөгч хэлэлцээ хийхэд бэлэн гэж бодож байна. Украин харин арай бэлэн болоогүй мэт санагдаж байна" гэжээ.

"Reuters"-ийн сэтгүүлч түүнээс "Дэлхийн хоёрдугаар дайнаас хойших Европын газар нутаг дээрх хамгийн том мөргөлдөөнийг АНУ-ын тэргүүлсэн хэлэлцээрүүд яагаад зогсоож чадахгүй байна вэ?" гэж асуухад Трамп "Зеленский" гэж хариулсан байна.

Мөн ирэх долоо хоногт Швейцарьт болох Давосын чуулганы үеэр Зеленскийтэй уулзах эсэхийг нь асуухад "Хэрвээ Зеленский тэнд байвал уулзана. Би ч тэнд байх болно" гэжээ. Гэхдээ уулзалтыг нарийн төлөвлөсөн зүйл байхгүй аж.

Трамп, Зеленский нар үргэлж ойр дотно харилцаатай байсан гэхгүй ч өнгөрсөн оныг бодвол арай сайжирсан болов уу. Харин Путины тухайд Трамп түүний хэлсэн үг бүхэнд итгэхэд бэлэн байдаг гэхэд хилсдэхгүй. Энэ нь заримдаа АНУ-ын хууль тогтоогчид, Европын удирдагчдыг бухимдуулдаг талтай. Энхийн хэлэлцээ сүүлийн хэдэн долоо хоногт дайны дараах Украины аюулгүй байдал, сэргээн босголтод төвлөрч буй. Үүний зэрэгцээ Украиныг Донбассын бүс нутгаас гарахыг шаардаж байна.