Японы ерөнхий сайд Санаэ Такаичи ирэх долоо хоногийн Баасан гаригт (2026.01.23) эхлэх парламентын ээлжит чуулганы үеэр Доод танхимыг хугацаанаас нь өмнө тарааж, ээлжит бус сонгууль зарлахаар шийдсэн гэж эрх баригч намын нэг бүхий удирдлага мэдэгджээ. Такаичи өчигдөр орой (2026.01.14) Ерөнхий сайдын ордонд Либерал ардчилсан нам болон эвслийн түнш Японы Инновацын намын өндөр албан тушаалтнуудтай уулзсан байна. Уулзалтын дараа намын удирдлагууд ерөнхий сайд гэнэтийн сонгууль зарлах шийдвэр гаргасныг олон нийтэд мэдээлжээ.

Мөн Такаичи ирэх Даваа гаригт (2026.01.19) хэвлэлийн бага хурал хийж, шийдвэрийнхээ шалтгаан болон дэлгэрэнгүй мэдээллийг өгөх аж.

Такаичи өнгөрсөн оны аравдугаар сараас хойш ерөнхий сайдаар ажиллаж байгаа бөгөөд Японы Инновацын намтай эвслийн засгийн газар байгуулсан юм. Такаичигийн засгийн газар эрх мэдлийн нарийн тэнцвэрт байдалд оршин тогтнож байгаа тул сонгуулиар дамжуулан байр сууриа бэхжүүлэх гэж оролдож байгаа бололтой. Энэ удаагийн Доод танхимын сонгууль нь хоёр жилийн дараа бүрэн эрхийн хугацаа нь дуусахаас өмнө явагдах гэж байна. Либерал ардчилсан намын зарим гишүүд шинэ санхүүгийн жил эхлэхээс өмнө улсын төсвийг батлахад анхаарах ёстой гэж үзэж байна.

Сөрөг хүчний намууд ерөнхий сайд Такаичигийн Доод танхимыг тараах шийдвэрийг шүүмжилжээ. Үндсэн хуулийн ардчилсан намын ерөнхий нарийн бичгийн дарга Азүми Жүн хэлэхдээ, улсын төсвийн хуулийн төслийг хэлэлцэх явцыг зогсоож байгаагийн хариуд Доод танхимыг тарааж байгаа шалтгааныг ойлгохгүй байна гэж мэдэгдэв. Тэрбээр Ерөнхий сайд өндөр дэмжлэгийн үзүүлэлттэй байгаа учраас энэ асуудлыг өөрийн шийдвэрт үлдээж байна гэсэн байр суурийг хүлээн зөвшөөрөх боломжгүй гэжээ. Мөн Ард түмний төлөөх Ардчилсан намын дарга Тамаки Юйчиро хэлэхдээ, ерөнхий сайд сонгууль зарлахаас илүүтэй эдийн засгийн бодлогыг тэргүүн зорилт болгох нь зүйтэй гэж үзэж байгаагаа илэрхийлжээ. Тэрбээр нам нь сонгуулийн кампанит ажлын үеэр илүү сайн эдийн засгийн бодлого хэрэгжүүлэхийг уриалж тэмцэх болно гэж хэлсэн байна.