АНУ Венесуэлийн газрын тосыг анх удаа зарж борлууллаа. Энэ удаад 500 сая ам.долларын газрын тос зарсан бөгөөд цаашдаа ч илүү ихийг зарах төлөвтэй байгааг албаныхан мэдээлж байна. Трамп Венесуэль ажиллагаа явуулсан тэр өдрөөс хойш тус улсын газрын тосны асар их нөөцийг ашиглах төлөвлөгөөтэй байгаагаа мэдэгдсэн билээ.

Венесуэлийн эрчим хүчний дэд бүтцийг сэргээн босгоход газрын тосны салбараас дор хаяж 100 тэрбум ам.доллар орж ирэх аж. Гэхдээ Трамп энэ тоог хаанаас гаргаж ирсэн нь тодорхойгүй.

Трампын засаг захиргааны энэ төлөвлөгөөг АНУ-ын эрчим хүчний салбарын удирдлагууд эргэлзэн хүлээж авчээ. Тухайлбал, "ExxonMobil"-ын гүйцэтгэх захирал Даррен Вудс "Энэ хөрөнгө оруулалтаас ямар ашиг гарахыг мэдэхийн тулд хууль эрх зүйн болон бизнесийн олон төрлийн дүрэм, зохицуулалтыг тодорхой болгох ёстой" гэсэн байна. Компаниуд тодорхойгүй хөрөнгө оруулалтад итгэлтэй бус байгаа тул Цагаан ордонд олон цагаар үргэлжилсэн уулзалтаас Трамп болон түүний зөвлөхүүд сайн мэдээ сонсолгүй өндөрлөжээ. Өөрөөр хэлбэл, Америкийн компаниуд Венесуэльд олон тэрбумын хөрөнгө оруулах амлалт хараахан өгөөгүй байна.

Нэгдүгээр сарын 14-ний анхны худалдааны талаар дэлгэрэнгүй мэдээлэл алга байна. Гэхдээ Цагаан ордны хэвлэлийн төлөөлөгч Тэйлор Рожерсын хэлснээр Трампын баг Венесуэлийн газрын тосны дэд бүтцийг сэргээхийн төлөө урьд өмнө байгаагүй хөрөнгө оруулалт хийхэд бэлэн байгаа газрын тосны компаниудтай эерэг хэлэлцээг тасралтгүй хийж байгаа ажээ.

"Reuters" агентлагт мэдээлснээр, Венесуэлийн түүхий газрын тосыг Канад зэрэг бусад орны өрсөлдөгч газрын тостой харьцуулахад хамаагүй хямд үнээр санал болгож байна.