Венесуэлийн тэргүүн хатагтай Силия Флорес эрх мэдэл, хүч чадалд тун ойрхон нэгэн байв. Түүний нөхрийнхөө гол "тархи" гэж тодорхойлдог нь ч бий. Гэвч АНУ-ын цэргийн ажиллагааны үеэр Силия Флорес мөн адил гэмт хэрэгт буруутгагдаж, баривчлагдсан юм. Тэгвэл "NEWS" агентлагийн "ХҮМҮҮС" буландаа Силия Флорес хэн болох талаар онцолж байна.

Силия Флорес 1956 оны зургадугаар сарын 15-нд Венесуэлийн Кохедес мужийн Тинакуильо хэмээх жижиг хотод төрсөн. Тэрбээр энгийн, ажилчин ангийн гэр бүлд ууган охин болж өссөн нь түүний үнэт зүйлс болон ирээдүйн улс төрийн замналыг хүчтэй тодорхойлсон юм. Бага насандаа Флорес орон нутгийн нэг өдрийн амьдрал хэрхэн өнгөрдөг, бодит байдлыг биеэр мэдэрсэн тул эрх мэдэл, хүч чадалтай нэгэн болохоор сэтгэл шулуудсан байдаг. Түүний гэр бүл сахилга бат, хариуцлага, боловсролын ач холбогдлыг нэн тэргүүнд авч үздэг байжээ. Жижиг хотын эгэл хүүхдүүдийн адил Флорес өөртөө л найдаж, тэсвэр тэвчээртэй байхыг эртнээс сурчээ. Эдгээр чанарууд нь хожим түүний улс төрийн амбицад чухал үүрэг гүйцэтгэсэн. Боловсрол нь түүний хүмүүжилд чухал байр суурь эзэлж байв. Флорес багаасаа зорилготой, шаргуу байсан бөгөөд нөөц боломж хязгаарлагдмал байсан ч гэр бүл нь боловсролыг чухалчилдаг байв.

Эдийн засгийн тэгш бус байдал тод мэдрэгддэг бүс нутагт өссөнөөрөө Флоренс жирийн венесуэлчүүдийн тулгардаг нийгмийн бэрхшээлийг эртнээс ойлгож эхэлсэн.

Энэ нь түүнийг улам хичээхэд хүргэж, нийгмийн янз бүрийн давхаргын ялгаа болон сул дорой бүлгүүдийг төлөөлөх урам зориг болжээ. Улмаар Флорес хуульч мэргэжлээр суралцаж, улс төрд оролцон, үндэсний түвшинд танигдсан нэгэн болсон юм. Түүний бага нас нь нийгмийн шударга ёс, олон нийтийн хөдөлгөөнтэй ойр улс төрч болох дүр төрхийг бүрдүүлэхэд чухал нөлөө үзүүлжээ. Гэвч өдгөө 69 настай Флорес АНУ-ын цэргийнхэнд нөхөртэйгөө хамт баривчлагдаж, Манхэттэний шүүхэд өөрийгөө гэм буруугүй хэмээн удаа дараа мэдэгдэж байна. Хэдийгээр улсын тэргүүн хатагтай боловч АНУ-ын шүүх тогтолцооноос мултарч чадахгүй, тус улсын шоронд хоригдож байна. АНУ-ын прокурорууд Флоресыг кокаин, хар тамхины хуйвалдаанд оролцсон, хууль бус автомат зэвсэг болон тэсрэх хэрэгсэл эзэмшсэн, мөн эдгээртэй холбоотой хуйвалдаанд оролцсон хэмээн буруутгаж байна.

УЛС ТӨРИЙН ТОГЛОГЧ

Флорес ерөнхийлөгчийн эхнэрээс илүүтэй өөрийн гэсэн улс төрийн амбицтай нэгэн байсан. Тэрбээр ерөнхийлөгч асан Уго Чавесыг удаан хугацаанд тууштай дэмжиж, түүний үзэл суртлыг үнэнчээр дэмждэг байсан. Гэсэн хэдий ч зүгээр нэг дагагчаас илүүтэйгээр Флорес өөрийгөө түүний тойрог замд байрлуулсан. Чавесын улс төрийн карьер өсөхийн хэрээр Флорес ажилчин ангиас Венесуэлийн хамгийн хүчирхэг эмэгтэй болжээ.

Мадуро 2013 оны кампанит ажлынхаа үеэр эхнэр нь орон нутгийн Кохедес мужаас Катиа руу нүүсэн гэж хэлж байжээ. Катиа нь Каракасын баруун бүс нутагт байрладаг бөгөөд Чавесын улс төрийн гол хөдөлгөөн өрнөдөг цэг байв. Флорес маш сайн сонсогч, хамрагч байсан гэгддэг бөгөөд хууль болохыг тулд хичээнгүйлэн суралцдаг байв. Дараа нь тэрбээр нэгэн мөрдөгчтэй гэр бүл болж, гурван хүүтэй болсон байна. Гэхдээ 1989 онд Каракаст болсон үймээний үеэр Флорес урьдын адил биш болсон байлаа. Тухайн үед шатахууны үнийн өсөлт иргэдийн бухимдлыг төрүүлж, улс төр ч бужигнаж байв.

Флорес хожим тэр л үе түүний амьдралын эргэлтийн цэг болсон гэж хэлж байжээ.

Чавес тэргүүтэй хувьсгалчид 1992 онд шоронд орсноос Флорес туслах хүсэлтэй байгаа талаараа захидлаар илгээсэн байдаг. Энэ нь одоогийн Венесуэлийн улс төрийн эхлэл болсон бололтой. Дараа нь 1994 онд Флорес Чавесыг суллагдахад тусалснаар улс даяар олны анхааралд орсон юм. Эл үеэр тэрбээр Николас Мадуротой танилцсан. Чавесыг шоронгоос гарч ирснээс хойш түүнд Флорес хуулийн зөвлөгөө өгдөг болж, сонгуулийн багийн нэг хэсэн болсон байна. 1999 онд Чавес ерөнхийлөгчийн тангараг өргөх үед Флорес түүний “Боливарын хувьсгал”-ын гол хүн болжээ. Дараа жил нь Флорес Венесуэлийн Үндэсний ассамблейн гишүүн болсон бөгөөд түүний улс төрийн замнал эрчимтэй ахиж, улмаар парламентын даргын албан тушаалд хүрсэн байна. Тэрбээр энэ албан тушаалыг хашсан Венесуэлийн анхны эмэгтэй болжээ.

Улс төрийн карьер нь өсөн дэвжиж байх үед түүний хайр дурлалын харилцаа ч цэцэглэж байлаа. 2011 онд Чавес түүнийг ерөнхий прокуророор томилсноор Флорес парламентын ажлаа орхисон байна. Тэр үед Мадуро Чавесын залгамжлагчаар бэлтгэгдэж байв.

2013 онд Чавес хорт хавдраар нас барсны дараа Мадуро Флоресын бүрэн дэмжлэгтэйгээр хөдөлгөөний шинэ удирдагч болсон юм.

Тэр жилээ хосууд гэрлэж, ерөнхийлөгчийн ордон болох Мирафлорес ордонд нүүж оржээ. Мадуро ерөнхийлөгч болсноор Венесуэл улс төрийн шинэ эрин үе рүү орж, хос хоёр улсын удирдлагын оройд гарч ирсэн юм.

ВЕНЕСУЭЛИЙН ХҮЧИРХЭГ ХОС: НИКОЛАС МАДУРО БА СИЛИЯ ФЛОРЕС

Силия Флорес зөвхөн “Тэргүүн хатагтай” биш, улс төрд идэвхтэй оролцож байсан ”анхны хувьсгалчдын нэг" гэж Чавизмын үзэл баримтлалд нэрлэгддэг. 2013 онд ерөнхийлөгч болохоосоо өмнө Мадуро Флоресыг “Эх орныхоо төлөө тулалдаж байсан анхны тэмцэгч, анхны социалист, ард түмний анхны эмэгтэй” байх ёстой гэж хэлсэн байна. Венесуэлийн нэг ахмад улс төрч түүнийг “Мадурогийн хүчирхэг гар” хэмээн тодорхойлсон бөгөөд эрх мэдэлтэй, нууц боловч нөлөөтэй гэж тэмдэглэжээ. Флорес олон нийтийн үйл ажиллагаанд төдийгүй нэвтрүүлэг, ярилцлагад ч нөхрийнхөө хамт оролцдог байна.

Учир нь тэрбээр Мадурогийн хамгийн итгэлтэй зөвлөхүүдийн нэг бөгөөд улс төрийн шийдвэрт чухал стратегийн үүрэг гүйцэтгэдэг.

Өмнөх тагнуулын албаныхан түүнийг “бүх зүйлийг хөшигний цаанаас удирддаг” гэж тодорхойлж байсан удаа ч бий. Гэхдээ хосууд дундаасаа хүүхэдгүй юм. АНУ-ын засгийн газар Мадуро болон Флоресыг Венесуэлээс тэрбум тэрбумаар нь ам.доллар хулгайлсан гэж буруутгасан ч хосуудын хувийн хөрөнгө ямар хэмжээнд байгаа нарийн мэдээлэл байхгүй.

КАРТЕЛИЙН НАГАЦ ЭГЧ

Флорес Венесуэлийн Үндэсний ассамблейд ажиллаж байхдаа гэр бүлийн гишүүн, ойрын нөхдөө төрийн албанд оруулсан гэж шүүмжлүүлж байсан. Түүнийг нөлөөгөө ашиглан ах, үеэл, эгч дүү, бүр өмнөх нөхрөө төрийн албанд тавьсан гэж шүүмжилсэн. Зарим хууль тогтоогчид түүнийг Ассамблейн дэмжлэгийн 50 ажилтныг өөрийн хүмүүсээр сольсон гэж үздэг. Гэсэн хэдий ч Флорес эдгээр буруутгалыг үгүйсгэж, “Би гэр бүлээ дэмжиж ажиллуулахдаа бахархаж байна” гэж хэлж байв.

Дараа нь Флорес хэвлэл мэдээллийн эрхийг хязгаарлаж, зөвхөн төрийн өмчийн хэвлэлд Ассамблейн танхимд нэвтрэх боломж олгосон.

АНУ-ын шүүх 2020 онд Венесуэлийн ерөнхийлөгч Николас Мадурог буруутгасан. Гэхдээ Флоресыг төдийлөн буруутгаагүй байна. Гэвч тэрхүү яллах дүгнэлт шинэчлэгдэж 2026 онд олон нийтэд нээлттэй болсон тул Флоресын нэр болон түүний буруутай үйлдлийн жагсаалт нэмэгдсэн. Флорес одоо Мадуро болон тэдний хүүтэй хамт кокаин наймаа болон хууль бус зэвсэг эзэмшсэн хэрэгт буруутгагдаж байна. Шинэчилсэн АНУ-ын яллах дүгнэлтэд Мадуро, Флорес нар урт хугацааны хар тамхины үйл ажиллагаанд хамтран оролцож, үүнийг хамгаалахын тулд зэвсэгт бүлгүүдийг ашигласан гэж буруутгажээ. Прокурорууд тэднийг хар тамхины сүлжээнд холбогдсон хүн барьцаалах, зодох, алах хэрэгт оролцсон гэж мэдээлж байна.

АНУ-ын шүүхийн хэрэгт ашигласан нотлох баримтын нэг нь Флоресын хоёр үеэлийн 2016 оны хэрэг юм.

Тэд АНУ руу хэдэн зуун килограмм кокаин илгээх гэж оролдсон хэрэгт буруутгагдаж, урт хугацаагаар хоригдсон бөгөөд хожим долоон Америк иргэний оронд суллагдсан. Мөн яллах дүгнэлтэд 2007 онд Флорес хар тамхины наймаачид болон Венесуэлийн эсрэг хар тамхины албаны дарга хооронд уулзалт зохион байгуулахдаа их хэмжээний хахууль авсан гэж буруутгажээ. Тэр мөн кокаин тээвэрлэж байсан онгоцтой холбоотой хэргүүдээс авлига хүртэж байсан гэж буруутгагдаж байна. Тиймээс одоо зөвхөн Манхэттэний шүүхийг дүгнэлтийг л хүлээх үлдлээ.