Японы ерөнхий сайд Санаэ Такаичи парламентын ээлжит бус сонгуулийг ирэх сард товлож магадгүй гэх мэдээлэл "Japan Today", "Japan Times", "Reuters" зэрэг хэвлэлд хэдэн өдрийн өмнө гарсан. Албан ёсоор бол ээлжит сонгууль 2028 оны аравдугаар сард болох учиртай.

Тэгвэл Санаэ Такаичи өнөөдөр /2026.01.14/ эрх баригч эвслийн ахлах албан тушаалтнуудтай уулзаж, ээлжит бус сонгууль зарлах төлөвлөгөөгөө танилцуулж магадгүй байна.

Японы парламентын ээлжит чуулганыг нэгдүгээр сарын 23-нд хуралдуулахаар засгийн газар шийдвэрлэсэн. Тус чуулганы эхэнд Санаэ Такаичи Доод танхимыг тараах төлөвлөгөөгөө танилцуулж магадгүй гэв. Ерөнхий сайдын бодлогын илтгэлийн тов хараахан гараагүй байгаа ч гэлээ ихэвчлэн парламентын ээлжит чуулганы эхэнд танилцуулдаг. Энэ мэдээлэл эрт сонгууль болох магадлалтай гэсэн таамаглалыг улам бүр нэмэгдүүлж байгаа ажээ.

Санаэ Такаичи төрөлх Нара хотдоо Өмнөд Солонгосын ерөнхийлөгчийг хүлээж аваад, өнөөдөр Токиод эргэн ирж буй. Эргэж ирмэгцээ тэрбээр эвслийн албан тушаалтнуудтай уулзаж магадгүй байгааг "NHK" мэдээллээ.

Хэрвээ Такаичи Доод танхимыг тараахаар шийдвэл сонгуулийн санал хураалт хоёрдугаар сарын эхэн эсвэл дунд үед болж магадгүй. Зарим хэвлэлд мэдээлж буйгаар хоёрдугаар сарын 8, эсвэл 15 гэсэн огноо яригдаж байна.