Ерөнхий сайд Г.Занданшатар томилогдох үеэрээ шинээр байгуулагдах Засгийн газар нь МАН, АН, ХҮН намын 2024 оны УИХ-ын сонгуульд дэвшүүлсэн мөрийн хөтөлбөрийн зорилтуудыг тусгасан, хамтарсан Засгийн газрын үйл ажиллагааны хөтөлбөрийг үргэлжлүүлэн хэрэгжүүлж, өмнөх ололт амжилтыг улам бататгана хэмээн онцолсон. Мөн УИХ-ын гишүүдийн асуулт, санал дүгнэлтэд үндэслэн үйл ажиллагааны хөтөлбөрөө баяжуулж, зорилтоо шинэчлэн тодорхойлно гэдгээ илэрхийлсэн билээ.

Түүний дэвшүүлсэн хамгийн том зорилт бол хүний хөгжил байв. “Хүний хөгжил бол манай Засгийн газрын хамгийн том мега төсөл” хэмээн тодотгож, монгол хүний хөгжлийг бодлогынхоо цөмд, иргэдийн эрх ашгийг шийдлийнхээ голд тавьсан, ард түмний Засгийн газар байна гэдгээ амласан. Чадварлаг, бүтээмжтэй, эрүүл саруул, дэлхийд өрсөлдөх чадамжтай монгол хүнийг бэлтгэхийн тулд эрүүл мэнд, боловсрол, нийгмийн хамгааллын салбарт цогц реформыг эрчимжүүлнэ гэж мэдэгдсэн юм.

Үүнтэй уялдуулан бүтээмж, гүйцэтгэл, үр дүнд суурилсан цалин хөлсний бодлогыг салбар бүрд нэвтрүүлэх, халамжийн тогтолцоонд шинэчлэл хийж “хамгийн сайн халамж бол хөдөлмөр эрхлэлт” байх зарчмыг баримтална гэдгийг хэлж байв. Тэтгэврийн шинэчлэлийг эрчимжүүлж, нийгмийн даатгалын сангийн алдагдлыг бууруулан, сангийн удирдлага, менежментийг шударга, ил тод, мэргэжлийн хөрөнгийн удирдлагын тогтолцоонд шилжүүлэх зорилт дэвшүүлсэн.

Түүнчлэн байгалийн баялгийн асуудалд ч тодорхой байр суурь илэрхийлсэн. “Баялагтаа эзэн Монгол” үзэл санааг 2019 оны Үндсэн хуулийн нэмэлт өөрчлөлтөөр тодорхой зааж өгсөн гэдгийг сануулж, Үндэсний баялгийн сангийн тухай хуулийг бодитоор хэрэгжүүлэхийн төлөө ажиллана гэдгээ амласан. Тодруулбал, 2024 оны гүйцэтгэлээр 1.3 их наяд төгрөг Баялгийн санд төвлөрсөн нь эхлэл төдий бөгөөд үүнийг нэмэгдүүлж, менежментийг оновчтой болгож, ард түмэнд өгөөжтэй байлгах нь бодлогын гол зорилго хэмээн онцолсон. Богино настай, бусдад таалагдах шийдвэрээс татгалзаж, эцсийн зорилго нь ард түмний амьжиргааг сайжруулахад чиглэнэ гэдгийг хэлсэн юм.

Ерөнхий сайд мөн төрийн хариуцлагын асуудлыг хурцаар хөндсөн. Иргэдийн зовлон бол “хариуцлагагүйн зуд” болсныг онцолж, төр өөрөө ард түмнийхээ талд байх ёстой, энэ зарчмаа алдсан сайд, төрийн түшмэл бүр анхаарах шаардлагатайг сануулсан юм.

Хот байгуулалт, газар өмчлөлийн хүрээнд гэр хорооллыг орон сууцжуулахад газрын реформ чухал гэдгийг онцолж, газрын өмчлөлийг НИТХ-ын тогтоолоор баталгаажуулан нэг мөр өмчийн гэрчилгээ олгох, Өмчийн тухай хуулийг баталж өмчийн эрхийг цогцоор нь шийдэх шаардлагатайг дурдсан. Бүсчилсэн төлөвлөлт хийж, нийслэлийн зарим дүүргийг хот болгон хөгжүүлэх, төвлөрлийг сааруулах бодлого баримтлах ёстой гэж үзэж буйгаа илэрхийлсэн.

Дэлхийн геополитикийн тогтворгүй байдал, тарифын дайны нөхцөлд Монгол Улсад бодлогын тогтвортой байдал, залгамж чанар нэн чухал гэдгийг Ерөнхий сайд онцолсон. Нэг Засгийн газар гарч ирээд өмнөх бодлогоо үгүйсгэх ёсгүй, ялангуяа Засгийн газрын 14 мега төсөл нь улс төрийн мөчлөгөөс ангид, урт хугацаанд хэрэгжих учир эрх зүйн болон институцийн баталгаатайгаар тогтвортой хэрэгжих ёстой хэмээн байр сууриа илэрхийлсэн юм.

Уул уурхай, аж үйлдвэржилтийн тухайд Гашуунсухайт-Ганцмод боомтын дэд бүтцийг олон улсын стандартын дагуу өргөтгөж, хил, гаалийн нэгдсэн удирдлага, цахим шилжилтийг бүрэн нэвтрүүлэх, нүүрс химийн болон алт боловсруулах үйлдвэрийг дотоодын хөрөнгө оруулалт, олон улсын хамтын ажиллагаанд тулгуурлан хөгжүүлэх шаардлагатайг дурдсан. Төмөр, зэсийн үйлдвэрлэл бол улсын хөгжлийн суурь гэдгийг онцолж, алтны худалдан авалтыг уян хатан болгож, бичил уурхайчдын эрх зүйн орчныг сайжруулах нь валютын нөөцийг нэмэгдүүлж, төгрөгийн худалдан авах чадварыг хамгаалах чухал алхам гэдгийг тэмдэглэсэн билээ.

Эдгээр нь Ерөнхий сайд Г.Занданшатарын томилогдохдоо дэвшүүлсэн гол амлалт, зорилтууд юм. Одоо харин эдгээр үг бодит ажил, бодлого, үр дүн болон хэрэгжих эсэхийг ард түмэн анхааралтай харж, асууж, шаардах цаг ирээд байна.