Япон улсад 2025 онд 10 мянга гаруй компани дампуурсан нь сүүлийн 10 жил байгаагүй өндөр үзүүлэлт юм. Кредит судалгааны "Teikoku Databank" компанийн судалгаагаар өнгөрсөн жил 10,261 компани дампуурчээ. Энэ нь 2024 оныхоос 3.6 хувиар нэмэгдсэн үзүүлэлт юм. Эдгээр компаниудын өр нь хамгийн багадаа 10 сая иен буюу ойролцоогоор 63,000 ам.доллар байв. Гэхдээ тус улсын хувьд дараалан дөрвөн жил хувийн хэвшлийн дампуурал нэмэгдэж байна.

Олон компани түүхий эд, материалын үнэ өссөн, мөн ажиллах хүч, залгамжлагчийн дутагдал зэрэг шалтгаанаар дампуурсан. Эдгээр асуудал нэн ялангуяа жижиг бизнесүүдэд хүндээр тусжээ.Үйлчилгээний салбарын 2,648 компани дампуурсан бол борлуулалтын салбарын 2,193, барилгын 2021 компани дампуурчээ. Хэдийгээр дампуурсан компаниудын тоо өссөн ч нийт өр өмнөх жилээс ойролцоогоор 30 хувиар буурч, 9.5 тэрбум ам.доллар байсан аж. Үүнийг ихэнх дампуурсан компаниуд жижиг бизнес байсантай холбон тайлбарлаж байна.

"Teikoku Databank" компани 2026 онд ч дампуурал үргэлжлэх магадлал өндөр гэж анхааруулжээ. Түүхий эдийн үнэ өсөлт, ажиллах хүчний хомсдол, хүлээгдэж буй доод цалин нэмэгдэл зэрэг нь жижиг бизнесүүдэд нөлөөлж болзошгүй. Ялангуяа жижиг бизнесүүд цалин нэмэгдлийг даах, хангалттай ажилтан бүрдүүлэх боломжтой эсэхийг анхааралтай ажиглах хэрэгтэй гэжээ.