Б.Энхбаярыг Хууль зүй, дотоод хэргийн сайдаар өнгөрсөн 2025 оны аравдугаар сард томилсон. Тэрбээр "Хууль зүй, дотоод хэргийн сайдын гол чиг үүрэг бол Хууль зүйн бодлогын асуудал. Хүмүүс намайг Хууль зүй, дотоод хэргийн сайдаар томилогдсоныхоо маргааш Төрийн ордноос нэг хүнийг бариад явчих байх гэж бодож байгаа байх. Энэ бол гэмт хэрэг мөрдөн шалгах байгууллагын ажил. Харин би улс төрийн манлайллаа бол илэрхийлнэ. Хууль зүй, дотоод хэргийн сайдаар томилогдсон тохиолдолд миний анхны санаачлах хууль бол Гэр бүлийн тухай хууль байх болно. Муу муухай бүхэнтэй муу муухай аргаар тэмцэж болохгүй. Би чөтгөрийг дарах гэж байгаад чөтгөр болж болохгүй гэдэг зарчимтай" хэмээн мэдэгдэж байв.

• Хар тамхитай тэмцэх
• Гэрч, хохирогчийг хамгаалах тогтолцооны шинэчлэл
• Мөрдөн шалгалт, прокурорын хяналтын тогтолцоог сайжруулах
• Шүгэл үлээгчийг хамгаалах
• Иргэний хэрэг шүүхэд хянан шийдвэрлэх тогтолцоог сайжруулах
• Шүүхийн шийдвэр гүйцэтгэх тогтолцооны цогц реформ
• Нотариатын үйлчилгээг цахимжуулах гэх мэт асуудалд онцгой анхаарна гэлээ.

Хууль зүй, дотоод хэргийн сайд Б.Энхбаяр "Нийтдээ 20 орчим хуулийн 10 орчмыг Хууль зүйн дэд сайд ажлын хэсгийг нь ахалж ажиллана. Дэд сайд бид хоёр ажлаа хуваарилж авсан. Тав орчим бодлогын чанартай асуудлуудыг нь би өөрөө манлайлж ажиллана. Мөн 4-5 орчим хуулийг Хууль зүй, дотоод хэргийн яамны Төрийн нарийн бичгийн дарга ахалж ажиллана. Ирэх гуравдугаар сарын 25-ний дотор төлөвлөгөөний дагуу эдгээр хуулийн төслүүд иж бүрэн судалгаатайгаа, сайн боловсруулалттайгаар Засгийн газраар хэлэлцэгдэж, УИХ-д өргөн баригдсан байна" гэлээ.

Ийнхүү хууль эрх зүйн томоохон шинэчлэлүүд, шийдлүүдийг олон нийт Б.Энхбаяр сайдаас хүлээж буй. Тиймээс Хууль зүй, дотоод хэргийн сайд олон нийтэд танилцуулсан, хийхээр төлөвлөж буй ажлаа хийх л үлдэж байна.