Өмнөд Солонгосын прокурорууд ерөнхийлөгч асан Юн Сук Ёлд цаазаар авах ял оноохыг шүүхээс хүсчээ. Түүнийг төрийн эргэлт зохион байгуулсан гэх хэргээр буруутгаж байгаа бол Юн прокурорын дүгнэлтийг няцаасан хэвээр байна. Сөүлийн Төв дүүргийн шүүх дээр өчигдөр (2026.01.13) Юнтэй холбогдох хэргийн эцсийн хэлэлцүүлэг болсон. Эл үеэр прокурорууд Юныг төрийн эргэлт зохион байгуулсан гол хүн байсан гэж мэдэгдсэн байна. Тэд түүнийг эрх мэдлээ хадгалж, улс орныг дарангуйллын замаар удирдах зорилготой байсан гэж буруутгасан байна.

Юн уг хэргийг үгүйсгэж, цэргийн онц байдал зарласан нь бэлгэдлийн чанартай арга хэмжээ байсан бөгөөд сөрөг хүчний намын буруу үйлдлүүдэд олон нийтийн анхаарлыг хандуулах зорилготой байсан гэж тайлбарлажээ.

Өмнөд Солонгосын хуулиар төрийн бослого удирдсан хэрэг нь хамгийн хүнд гэмт хэрэгт тооцогддог бөгөөд цаазын ял эсвэл бүх насаар хорих ял оноох боломжтой. Прокурорууд эдгээрээс нэгийг нь заавал санал болгох ёстой байдаг тул Юнд цаазын ял хүссэн байна. Өмнөд Солонгос улс сүүлийн 30 орчим жил цаазын ял гүйцэтгээгүй. Өмнө нь цаазын ял оноосон ч дараа нь хөнгөрүүлсэн тохиолдлууд бий. Прокуроруудын мэдэгдсэнээр, хэдийгээр тухайн үйл явдлын үеэр хүний амь үрэгдээгүй ч Юны үйлдэл улс орны аюулгүй байдалд ноцтой аюул учруулсан гэж үзэж байна.

Юн парламентын гишүүдийг баривчлах тушаал өгсөн гэж мэдүүлсэн цэргийн командлагчийн мэдүүлгийг нотлох баримтаар танилцуулсан.

Мөн сэтгүүлч, хөдөлмөрийн идэвхтэн, улс төрчдийн нэрс бүхий зуу гаруй хүнийг "устгах" тухай дурдсан баримт бичгийг шүүхэд дэлгэсэн байна. Юны шүүх хурал тухайн үеийн засгийн газрын бусад өндөр албан тушаалтнуудын хэргүүдтэй нэгтгэн зохион байгуулагджээ.

Прокурорууд батлан хамгаалахын сайд асан Ким Ён Хёнд бүх насаар хорих ял, харин цагдаагийн дарга асан Чо Жи Ход 20 жилийн хорих ял оноохыг хүсжээ.

Шүүхийн шийдвэрийг хоёрдугаар сард гаргахаар төлөвлөж байна. Гэхдээ шүүгч прокуроруудын санал болгосон ялыг заавал дагах албагүй. Юн одоогоор хэд хэдэн эрүүгийн хэрэгт холбогдон саатуулагдсан хэвээр байна. Тэрбээр эрх мэдлээ алдсан ч дэмжигч баруун жигүүрийн бүлгүүд түүнийг сөрөг хүчний эсрэг тэмцсэн “золиос” хэмээн үзсээр байна.