АНУ-ын ерөнхийлөгч Дональд Трамп өчигдөр (2026.01.15) иранчуудыг эсэргүүцлээ үргэлжлүүлэхийг уриалж, өөрсдийг нь хүчирхийлж буй хүмүүсийн нэрсийг заавал санаж явахыг онцлон тэмдэглэсэн байна. Тэрбээр мөн "Тусламж замдаа явж байна" гэж мэдэгджээ. Энэхүү мэдэгдэл нь Ираны шашны удирдлагатай засаг захиргаа сүүлийн жилүүдэд гараагүй байсан хамгийн том эсэргүүцлийн жагсаал болж буйтай зэрэгцэн гарч байна. Харин Ираны засгийн газар Трампын мэдэгдлийн хариуд түүнийг улс төрийн тогтворгүй байдал өдөөж, хүчирхийлэлд турхирч байна хэмээн буруутгав.

Трамп "Truth Social" платформ дээрээ "Ираны эх орончид оо, эсэргүүцлээ үргэлжлүүлж, байгууллагуудаа өөрсдийн мэдэлд ав! Тусламж замдаа явж байна” гэж бичсэн.

Гэхдээ ямар тусламж болох талаар тодорхойлоогүй байна. Тэрбээр мөн жагсагчдын "утга учиргүйгээр" хөнөөх явдал зогсох хүртэл Ираны албан тушаалтнуудтай хийх бүх уулзалтаа цуцалсан гэдгээ мэдэгдэв, Дараа нь иранчуудад хандан “Алуурчид болон хүчирхийлэгчдийн нэрийг хадгалж аваарай. Учир нь тэд үйлийн үрээ эдлэх болно” гэж хэлжээ. Ираны нэгэн албан тушаалтан улс даяар хоёр долоо хоногоос илүү хугацаанд үргэлжилж буй үймээн самууны үеэр ойролцоогоор 2,000 хүн амиа алдсан гэж мэдэгджээ. Энэ нь эрх баригчид анх удаа нийт хохирогчдын тоог зарласан явдал боллоо.

АНУ-д төвтэй хүний эрхийн "HRANA" байгууллага баталгаажуулсан 2,003 нас баралтаас 1,850 нь жагсагчид байсан гэж үзэж байна. Тус байгууллагын мэдээлснээр, 16,784 хүн баривчлагдсан нь Даваа гаригт зарласан тооноос эрс өссөн үзүүлэлт юм.

Сэтгүүлчид Трампаас  Ираны жагсагчдад ямар тусламж хүргэх талаар асуухад "Та нар өөрсдөө ойлгох болно" гэж хариулсан байна. Тэрбээр Ираны эсрэг дарамт шахалт үзүүлэх арга хэмжээнүүдийн дунд цэргийн ажиллагаа ч багтаж байж магадгүй гэж өмнө нь мэдэгдсэн байна. “Хүн амь үрэгдсэн тоо их байгаа бололтой, гэхдээ бид одоогоор бүрэн баттай мэдэхгүй байна” гэж Трамп Детройтоос Вашингтоны бүс нутагт буцаж ирэхдээ хэлээд, Мягмар гаригийн орой Иран дахь эсэргүүцлийн талаарх тайланг авсны дараа илүү ихийг мэднэ гэв. “Бид нөхцөл байдалд тохируулан арга хэмжээ авна” гэж тэрбээр нэмж хэлсэн байна. Мөн АНУ-ын Төрийн департамент Мягмар гаригт Иранд байх америкчуудыг нэн даруй орхин гарахыг, боломжтой бол Турк эсвэл Армениар дамжин хуурай газраар гарахыг уриалжээ.