Дархан хот руу нүүсэн Хүнс, хөдөө аж ахуй, хөнгөн үйлдвэрийн яам/ХХААХҮЯ/-ны ажилчид эхнээсээ Улаанбаатар хот руу нүүж байна. Засгийн газрын хуралдаанаар 2024 оны есдүгээр сарын 11-нд Хүнс, хөдөө аж ахуй, хөнгөн үйлдвэрийн яамыг Дархан хот руу нүүлгэх шийдвэрийг гаргасан. Ингэхдээ хот, хөдөөгийн сэргэлтийн хүрээнд тус яамыг 2.4 тэрбум төгрөгөөр Улаанбаатар хотоос нүүлгэсэн бол Дарханд суурьшсан яамны ажилчдын орон сууцанд 3.1 тэрбум төгрөгийг зарцуулсан. Гэтэл улсын төсвөөс өчнөөн тэрбумыг зарцуулсан энэ шийдвэр хоёр жил ч хэрэгжсэнгүй, буцаж байна.  Яамныхан толгой мэдэн Улаанбаатар хот руу нүүхгүй, Засгийн газраас тодорхой шийдвэр гаргаснаар буцаж нүүж эхэлсэн гэх мэдээлэл ч байгаа юм.

ХХААХҮЯ-ыг Дархан-Уул аймаг руу нүүлгэх хүрээнд албан хаагчдад орон сууцны дэмжлэг үзүүлэх нэрээр Хөдөө аж ахуйн биржийн хуримтлагдсан ашгаас 3.1 тэрбум төгрөг гаргаж өгсөн нь хууль зөрчсөн үйлдэл болохыг аудитын байгууллага шалгалтаар тогтоосныг өмнө нь УИХ-ын гишүүн З.Мэндсайхан хөндсөн. Энэ асуудлыг хуулийн байгууллага шалгах ёстойг ч анхааруулсан. Харин экс сайд Ж.Энхбаяр "Хууль зөрчөөгүй" гэж биеэ өмөөрсөн билээ.

Түүнчлэн тус яамыг Дархан-Уул аймаг руу нүүлгэн шилжүүлсэн энэ асуудал нь зөвхөн сайд Ж.Энхбаярын хувийн бизнес рүүгээ яамыг ойртуулсан эрх ашигтай нь холбоотой явцуу шийдвэр гэж шүүмжлэх хэсэг ч байсан. Харин Ерөнхий сайд асан Л.Оюун-Эрдэнийн хувьд "Төвлөрлийг сааруулах хүрээнд төр захиргааны байгууллагыг Улаанбаатар хотоос гаргах ажил Хүнс хөдөө аж ахуй хөнгөн үйлдвэрийн яамаар эхлүүлсэн" гэдэг тайлбар хийсэн удаатай.

ХХААХҮЯ Дархан хотод төсвийн хөрөнгө оруулалтаар спорт цогцолборын зориулалтаар барьсан 10 давхар барилгад нүүж очсон байдаг. Яамны харьяа “Хөдөө аж ахуйн корпораци” ТӨХК, “Хөдөө аж ахуйн бирж” Жижиг, дунд үйлдвэрийн газар “Төвийн бүсийн хүнс, хөнгөн үйлдвэрлэл технологийн цогцолбор” ТӨХК, Малын удмын сангийн үндэсний төв гэсэн газрууд ажилладаг. Нийтдээ яаманд харьяалагдах газрын 70 хувь нь өнгөрсөн хугацаанд нүүсэн байсан юм. Тэгвэл тус яамыг Улаанбаатар хотод буцаан авч ирснээр төсвөөс зарцуулсан олон арван тэрбумаас эхлээд орон сууцны дэмжлэг нэрээр нийт 60 албан хаагчид олгосон 3.1 тэрбум төгрөгийг хэрхэн барагдуулж авах вэ гэдэг асуудал давхар сөхөгдөж байна.

Судалгаа тооцоо муутай, сэтгэл хөдлөл, ганц нэгхэн хүний эрх ашгийг хангах нэрээр хүчээр гаргасан шийдвэр насгүй, эцэст нь татвар төлөгчид хамаг ачааг нь үүрч үлддэг жишиг хэзээ эцэс болох вэ.