Оросын Үнэн алдартны сүм эмэгтэйчүүдийг үр хөндөлт хийхийг татгалзахыг уриалсан шинэ залбирлын үйл ажиллагааг улс даяар Ням гаригт (2026.01.11) эхлүүлжээ. Тухайлбал, дор хаяж 15 бүс нутагт нэгэн зэрэг залбирал болсон байна.

Сүм өнгөрсөн сард үр хөндөлтийн эсрэг залбирлыг хүчин төгөлдөр болгосон бөгөөд жирэмслэлтийг таслах гэж буй хүмүүст анхааруулга өгөх зорилготой гэж тайлбарлажээ.

Зарим сүмд үр хөндөлтийн эсрэг байгууллагуудын үзүүлэн материалыг дэлгэсэн бөгөөд үүнд ургийн загварууд багтсан байв. Москва хотын нэг сүмд “үр хөндөлтөөр амь үрэгдсэн хүүхдүүд”-ийн дурсгалд зориулж 3,000 лаа асаасан байна. Уг арга хэмжээнд Оросын парламентын гишүүд хүртэл оролцжээ . Харин өөр нэг бүс нутагт үр хөндөлт хийлгэсэн эмэгтэйчүүдийг насан туршдаа уучлал гуйж залбирч, өнчин хүүхдүүдэд туслахыг санваартан уриалсан байна. Үнэн алдартны сүм энэ залбирлыг Библийн түүхэнд гардаг нярай хүүхдүүдийг хоморголон устгасан үйл явдлыг дурсдаг шашны баяртай холбон тайлбарласан юм.

Сүмийн зүгээс уг залбирлыг жил бүрийн нэгдүгээр сарын 11-нд хийхийг зааварчилжээ.

Орос улсад жирэмсний 12 дахь долоо хоног хүртэл үр хөндөлт хийх нь хууль ёсны хэвээр байна. Гэсэн хэдий ч хүн амын тоо буурч, төрөлт багасаж буйтай холбоотойгоор үр хөндөлтийг хязгаарлах талаархи маргаан сүүлийн жилүүдэд эрчимжиж буй. Сүүлийн жилүүдэд Оросын Үнэн алдартны сүм үр хөндөлтийг хүн амины хэрэгтэй адилтгаж, сүмийн тэргүүн Патриарх Кирилл үр хөндөлтөөс эмэгтэйчүүдийг татгалзуулж чадвал хүн амын хямралыг “шидэт саваа” шиг хурдан шийдэж чадна хэмээн мэдэгдсэн юм.