Монгол Улсын Ерөнхий сайд Г.Занданшатар өчигдөр /2026.1.12/ Дорноговь аймгийн Сайншанд суманд иргэдтэй уулзаж, санал бодлоо солилцов. Тэрбээр “Ураны уурхайн үйл ажиллагааг эхлэхээр болбол бид олон нийтийн хяналтын зөвлөлийг байгуулж ажиллуулахаар шийдвэрлэсэн. Олон нийтийн хяналтын зөвлөл нь байгаль орчин болоод хүний эрүүл мэндэд хортой байгаа эсэхийг байнга хянаж ажиллана. Ус дулааны үнийн тарифын тухайд үүнийг олон жил төрийн бодлогоор, барьж санхүүжүүлж ирсэн.

Цахилгаан эрчим хүч, дулааныг үнэ нэмэгдэхээр бараа бүтээгдэхүүний суурь үнэ дагаж  нэмэгддэг. Ийм үед үнийг чөлөөлөх нь ард иргэдэд дарамт болж буух учраас энэ онд үнийн тарифыг нэмэгдүүлэхгүй.

Мөн засгийн газраас Орон сууцжуулах банк байгуулах шийдвэрийг гаргасан. Төрийн оролцоотойгоор загварын схемчлэхийг хийж хямд өртөгтэй орон сууцыг барьж байгуулж, залуучууд болон зорилтот бүлгийг хамруулна. “Орон сууцжуулах үндэсний хөтөлбөр”-ийг гуравдугаар сараас эхлэн хэрэгжүүлнэ. Иргэд хууль хэрэгжихгүй байгаа талаар хэлж байна. Хууль хэрэгжихгүй байх нь эмх цэгцгүй байдлын эх үндэс болдог. Саяхан Замын-Үүдийн гаалийн даргыг чөлөөлсөн. Энэ жишгээр салбар бүрийг хууль хяналтын байгууллагаар хянуулж, шалгуулах ажлыг эрчимжүүлнэ. Миний бие Ерөнхий сайдын ажлыг аваад зургаан сарын хугацаа өнгөрч байна. Цэгцлэх ажлын хүрээнд олон ажлыг санаачилж, газар бүрийн зах замбараагүй байдлыг эмхэлж цэгцэлж байгаа. Эхлүүлсэн ажил болгон эсэргүүцэл, гүтгэлэг, доромжлол болгонтой нүүр тулдаг. Олон улсын нөхцөл байдал хурцадсан, бензин тасарсан, гадаад худалдаа зогссон, эдийн засаг хямарсан, дотоод зөрчилтэй, улс төрийн жагсаал цуглаантай энэ үед ч бид эсэргүүцэл дундуур туучиж, эдийн засгийн үр дүнг гаргаж цэгцлэх хөдөлгөөний хэрэгжүүлж байгаа. Үнэнд гүйцэтгэж, өө хайгаад олдохгүй болохоор нь нэр хоч өгөх, худал мэдээлэл тараах технологийг хийж байна. Ийм зүйл хавтгайрч байгаад бид хаа хаанаа бодож, нягталж байх хэрэгтэй” гэдгийг онцолсон юм.

Н.Цолмонбаатар