ОХУ-ын арми Украинд шинэ төрлийн алсын тусгалтай дроноор довтолсныг Киевийн цэргийн тагнуулын агентлаг мэдэгдлээ. “Geran-5” гэх тус дрон нь 90 кг жинтэй цэнэгт хошуу тээвэрлээд, 960 гаруй км нисэх чадвартай хүчирхэг тийрэлтэт хөдөлгүүртэй. Харин овор хэмжээний хувьд 6.1 метр орчим урттай, далавч нь дангаараа 5.5 метр орчим.

Мөн “3G”, “4G” модем болон “Комета” хиймэл дагуулын навигацийн системийг ашигладгаараа давуу талтай. “Комета” нь олон төрлийн антен ашигладаг тул гацаж саатах нь бага байдаг.

Украины тагнуулын агентлагийн мэдээлснээр “Geran-5” нь Ираны Каррар довтолгооны дронтой олон талаараа төстэй аж. “Geran” цувралын өмнөх дронууд нь Ираны Шахедтай төстэй. Өөрөөр хэлбэл, төдийлөн өндөр үнэтэй бус учир олноор үйлдвэрлэдэг дронууд байв.

“Geran-5”-ын тийрэлтэт хөдөлгүүрийг Хятадын “Telefly” компанид үйлдвэрлэсэн бол микро компьютерыг нь “Raspberry Pi”-ээс санаа авч загварчилжээ. “Geran-3” загвар дээр “Telefly”-ийн “JT80” турбо хөдөлгүүрийг ашиглаж байсан. Энэ нь цагт 370 км зайд нисэх боломжийг олгодог хөдөлгүүр юм.