Оросын ерөнхийлөгч Владимир Путин өчигдөр (2026.01.07) Православын Христийн мэндэлсний баярыг тэмдэглэх үеэр Оросын цэргүүдийн гүйцэтгэж буй үүргийг Есүс Христийн ариун эрхэм зорилготой зүйрлэн тайлбарлалаа. Путин Москва мужид байрлах Гэгээн Георгийн сүмд болсон Зул сарын мөргөлд цэргийн алба хаагчид болон тэдний гэр бүлийнхний хамт оролцсон гэж Кремль мэдээлэв.

Мөргөлийн дараа хэлсэн үгэндээ тэрбээр “Өнөөдөр бид Христийн мэндэлсний гэрэл гэгээтэй, гайхамшигт баярыг тэмдэглэж байна. Бид Эзэн Бурхныг хүмүүсийг аврахаар дэлхийд ирсэн учраас Аврагч гэж нэрлэдэг. Үүнтэй адил Оросын дайчид эх орон, ард түмнээ хамгаалж, аварч ирсэн ариун үүргийг үргэлж гүйцэтгэж ирсэн” гэж Путин хэлсэн байна.

Тэрбээр мөн Оросын түүхийн туршид цэргүүдийг Бурхны нэрийн өмнөөс “ариун даалгавар” биелүүлдэг хүмүүс хэмээн үзэж ирсэн, “Эзэн Бурхны итгэмжлэгдсэн мэт” ханддаг байсан гэж онцоллоо.

Путин цэргийн алба хаагчдын хүүхдүүдэд хандан эцэг эхээрээ бахархах бүрэн эрхтэй гэдгийг хэлж, оросууд “үргэлж” цэргүүдээрээ бахархаж ирсэн гэжээ. Тэрбээр Христийн мэндэлсний баяр шашин шүтлэг хамаарахгүйгээр бүх Оросын цэргүүдэд баяр баясал өгдөг гэв. “Тэд баяр тэмдэглэх үед бид тэдэнтэй хамт баярладаг. Мөн бид хамтын ялалтаараа баярладаг. Ялалт гэдэг нь үргэлж нийтэд хамааралтай байдаг нь мэдээж” хэмээн Путин хэлсэн байна. Тэрбээр өнгөрсөн долоо хоногт Шинэ жилийн мэндчилгээндээ ч батлан хамгаалах сэдвийг онцлон, Украинд явагдаж буй Оросын нэрлэж буй “тусгай цэргийн ажиллагаа”-д оролцож буй дайчдыг улс даяар дэмжиж байгаа хэмээн мэдэгдсэн юм. “Манай эв нэгдлийн хүч нь эх орны бүрэн эрхт байдал, аюулгүй байдал, хөгжил дэвшил болон ирээдүйг тодорхойлдог” гэж тэр хэлээд, “бидний хүн нэг бүрийн хөдөлмөр, амжилт, ололт нь Оросын мянган жилийн түүхэнд шинэ хуудсыг нэмж байдаг” гэжээ.