Орчин цагийн Улаанбаатар хотод өнгөрсөн түүхийн баримт, дурсгал болсон байшин барилга маш цөөн үлдсэн. Гарын 10 хуруунд багтахгүй түүхэн дурсгалт барилга, байшингуудын ихэнх нь хувийн хэвшлийн эзэмшилд очиж, сүйдэж эхэлсэн. Тэгвэл өчигдрөөс нийслэлийн өмчийн Соёлын төв өргөөг нурааж, 50 давхар шинэ барилга барина гэх мэдээлэл олон нийтийн сүлжээнд цацагдав. Энэ талаар албаныхнаас тодруулахад "Соёлын төв өргөөг нураах талаар албан ёсны ямар нэгэн шийдвэр гараагүй. Харин энэ барилгыг судалж, эргэн танилцуулах үүрэг өгсөн" гэх тайлбарыг өгсөн юм.

Нийслэлийн удирдах ажилтнуудын 2025 оны 12 дугаар сарын 30-ны өдрийн шуурхай зөвлөгөөн дээр Улаанбаатар хотын Захирагч Х.Нямбаатар "Соёлын төв өргөөний барилгыг нурааж, хоёр блок бүхий 50 давхар барилга барих төслийг боловсруулж, саналыг нийслэлийн Засаг даргын зөвлөлийн хуралд танилцуулах үүргийг нийслэлийн Засаг даргын Тамгын газрын Хөрөнгө оруулалтын хэлтэс болон нийслэлийн Засаг даргын эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалайд даалгасан байна. Олон нийтийн шүүмжлэл дагуулсны дараагаар үүрэг даалгавраас Соёлын төв өргөөтэй холбоотой хэсгийг хасчээ.

Хотын дарга Х.Нямбаатар 2025 оны наймдугаар сард "Их тойруу, Бага тойруу дотор долоон давхраас дээш өндөртэй барилга бариулахгүй. Өнөөдөр 40, 50 мянгатын байруудыг буулгаж, эхнээсээ 16-20 давхар барилгууд барьж байна. Хотын төв хөрөөний ир шиг янз бүрийн өндөртэй барилгуудаар дүүрлээ" гэдгийг онцлон мэдээлж байв.

"ХУУЧИН ХОТЫНХОО ДҮР ТӨРХИЙГ ЭВДЭЖ, УСТГААД ШИНЭ БАРИЛГА БАРИАД БАЙХ НЬ ЗОХИСГҮЙ"

СТӨ-Г ЗХУ-ЫН ТУСЛАМЖААР 1988 ОНД БАРЬЖ, МОНГОЛЧУУДАД БЭЛЭГЛЭСЭН ТҮҮХТЭЙ

Соёлын төв өргөө нь Улаанбаатар хотын Сүхбаатарын талбайн зүүн талд байрлах соёлын томоохон цогцолбор юм. Энэ барилгыг анх Шинжлэх ухаан, техник, соёлын ордон нэртэйгээр Зөвлөлтийн тусламжаар барьж, 1988 оны арванхоёрдугаар сарын 29-ний өдөр монголчуудад бэлэглэсэн бөгөөд ашиглалтад орсон цагаас хойш өнөөг хүртэл тасралтгүй үйл ажиллагаа явуулсаар ирсэн.

Нийт 15 мянган метр.кв талбайтай. Цогцолбор нь 1325, 280, 150 хүний суудалтай хурал, концерт, кино, лекцийн танхим, номын сан, музей, үзэсгэлэнгийн танхим, 12 давхар захиргааны барилга зэргээс бүрддэг.

Уг цогцолборт Монгол Улсын Шинжлэх ухаан академи, Монголын Урлагийн ажилтны холбоо, Соёл урлагийн хороо, Хүүхдийн номын ордон, Сөүлийн соёл мэдээллийн төв, Уран зургийн галерей, Соёлын өвийн төв, Театрын музей, нийслэлийн Соёл урлагийн газар, Улсын филармони, Морин хуурын чуулга, “Баянмонгол” чуулга, “Соёл-Эрдэнэ” хамтлаг, Хошин урлагийн “Х-түц”хамтлаг, “Хувьсал” продакшн зэрэг шинжлэх ухаан, соёл урлагийн салбарын төрийн ба төрийн бус олон нийтийн байгууллага, хувийн хэвшлийн 100 гаруй аж ахуйн нэгж төвлөрч үйл ажиллагаагаа явуулж байна.

Тус ордонд жилд ойролцоогоор 300 орчим нийтийг хамарсан урлаг соёлын олон талт арга хэмжээ зохиож, давхардсан тоогоор 350-400 гаруй мянган үзэгчдэд хүрч үйлчилдэг бөгөөд 80 гаруй хүн ажилладаг байна.