АНУ-ын хүчин Венесуэлийн ерөнхийлөгч Николас Мадурог баривчилсныхаа дараа Нью-Йорк хотод аваачсан. Нью-Йорк дахь түүний анхны шүүх хурлын сонсгол Даваа гаригт /2025.01.05/ болж, 40 орчим минут үргэлжилжээ. Хэдхэн сарын өмнө Шон "Дидди" Комбсын ял авч байсан шүүх танхимд Мадурогийн сонсгол болсон байна.

Шүүх танхимд орж ирснийх нь дараа шүүгч Алвин Хеллерстейн түүнээс өөрийгөө танилцуулахыг хүссэн. Мадуро хариуд нь "Намайг Николас Мадуро гэдэг. Би Бүгд найрамдах Венесуэль улсын ерөнхийлөгч бөгөөд нэгдүгээр сарын 3-наас хойш барьцаалагдаад байна. Намайг Венесуэлийн Каракас дахь гэрээс маань баривчилсан" гэжээ.

Энэ үеэр шүүгч түүний үгийг тасалж, "Энэ талаар дараа ярих цаг олдоно" гэсэн байна.

Даваа гаригийн сонсголын үеэр Мадуро ч тэр, эхнэр Силиа Флорес нь ч тэр хар тамхи болон зэвсгийн наймааны хэрэгт холбоо хамааралгүй гэж ам өчиг өгчээ. "Би гэмгүй хүн. Би төлөв төвшин хүн" гэж Мадурог хэлэхэд эхнэр нь "Бүрэн гэмгүй" гэж үг нэмэрлэсэн байна. Мадуро шүүх хурлын үеэр зарим зүйлийг тэмдэглэлийн цаас дээр нямбай бичиж авсан бөгөөд сүүлд нь энийгээ аваад явж болох уу гэж шүүгчээс асуужээ. Эхнэр, нөхөр хоёулаа цэнхэр, шар судалтай шоронгийн хувцас өмссөн байсан бөгөөд шүүх хурлын явцыг чихэвчээр шууд орчуулгатай сонссон аж.

Мадуро шүүх хурлын турш тун тайван, тэр гэх илэрхийлэмжгүй царай төрхтэй байсан. Сонсголын төгсгөл хэсэгт танхимаас нэгэн хүн түүн рүү "Чи гэмт хэргийнхээ төлөөсийг төлнө" гэж хашгирах үед ч Мадуро тайван байжээ. Гэхдээ өөдөөс нь "Би ерөнхийлөгч хүн, бас дайны олзлогдогч" гэж хашгирсан байна.

Эргэн сануулахад, АНУ Мадурог мансууруулах бодистой холбоотой терроризмын хуйвалдаан, кокаин импортлох хуйвалдаан, пулемёт болон устгах төхөөрөмж эзэмшсэн, энэ төрлийн хуйвалдаан зохион байгуулсан гэж буруутгаж байна. Дараагийн сонсгол гуравдугаар сарын 17-нд товлогджээ.