АНУ-ын цэргийнхэн өчигдөр өглөө /2026.01.03/ Венесуэльд томоохон хэмжээний цохилт өгч, тус улсын ерөнхийлөгч Николас Мадурог эхнэрийнх нь хамт баривчилсан гэдгийг Трамп баталлаа. Тэрбээр ажиллагаа амжилттай болсон тухай "Truth Social" хаягаараа жиргэсэн билээ. Эх сурвалжийн мэдээлснээр, Бямба гаригийн өглөө Венесуэлийн нийслэл Каракас хотод дор хаяж долоон удаа дэлбэрэлтийн чимээ сонсогджээ.

Тэгвэл Венесуэлийн дэд ерөнхийлөгч Делси Родригез Орост байгаа талаар түүний албаны дөрвөн эх сурвалж мэдээлсэн байна. Мөн түүний ах, үндэсний чуулганы дарга Хорхе Родригез Каракаст байгаа гэж байршлыг мэддэг гурван эх сурвалж мэдэгдэв.

Делси Родригез халдлага болсны дараа төрийн өмчит телевизээр аудио мессеж цацаж, Мадуро болон түүний эхнэр Силиагийн амьд үлдсэнийг нотлох баримт шаардсан байна. Харин Хорхе Родригез халдлагаас хойш гарч ирээгүй байна. Улмаар Венесэулийн төр хөл толгойгоо олохгүй байдалд шилжиж байна. Цохилт болохоос өмнө Николас Мадуро АНУ-тай маргаанаа түр хойшлуулж, яриа хэлэлцээ хийхэд бэлэн мэдэгдэж байсан юм. Тэрбээр "АНУ-тай хар тамхины наймаа, газрын тос, цагаачлалын асуудлаар тэдний хүссэн цагт, хүссэн байршилд хэлэлцэхэд бэлэн байна" гэсэн юм.

Үүнээс гадна, сүүлийн хэдэн сарын хугацаанд Венесуэлийн аюулгүй байдлын хүчнийхэн дор хаяж таван АНУ-ын иргэнийг саатуулсан тухай Вашигтоны албан тушаалтан мэдээлжээ. Энэ нь АНУ Венесуэлийн ерөнхийлөгч Николас Мадурод үзүүлж байсан дарамт, шахалттай холбоотой гэж үзэж байна. Уг дарамтад хориг арга хэмжээ, газрын тосны хориг, хар тамхины наймаатай холбоотой цохилтууд багтаж байсан. АНУ-ын албаныхны хэлснээр, саатуулагдсан иргэдийн хэрэг, нөхцөл байдал харилцан адилгүй бөгөөд зарим нь хар тамхины хууль бус наймаанд холбоотой байж болзошгүй аж. Гэсэн ч Венесуэль эдгээр америкчуудыг АНУ-тай хэлэлцээ хийхэд ашиглах дарамтын хэрэгсэл болгон барьж байгаа гэж АНУ үзэж байна. Энэ нь Орос улс өмнө нь АНУ-тай хэлэлцээ хийх үедээ америкчуудыг саатуулж байсан тактиктай төстэй юм.