Японы ерөнхий сайд Санаэ Такаичи, АНУ-ын ерөнхийлөгч Дональд Трамп нар Баасан гаригт /2026.01.02/ 20 гаруй минут утсаар ярьжээ. Тэд хамгийн сүүлд өнгөрсөн оны арваннэгдүгээр сард утсаар ярьсан билээ. Баасан гаригт утсаар ярих үеэр талууд ирэх хавар уулзаж, хоёр улсын харилцааг эдийн засаг, аюулгүй байдал гээд олон талбарт гүнзгийрүүлэхээр тохирсон байна.

Талууд 2026 онд Япон-АНУ-ын харилцаанд шинэ үе нээгдэж байгааг онцолжээ. Үүний зэрэгцээ талууд Өмнөд Солонгостой гурван талт харилцааг бэхжүүлж, чөлөөт, нээлттэй Энэтхэг-Номхон далайн бүс нутгийн хамтын ажиллагааг нэмэгдүүлэх зэрэг амлалтаа баталгаажуулсан байна.

Тэд Хятад, Японы сүүлийн үеийн хурцадмал байдлын талаар хэлэлцсэн эсэх нь тодорхойгүй.

Дашрамд дурдахад, энэ үеэр Трамп Японы ерөнхий сайдыг АНУ-д айлчлахыг урьжээ. Айлчлал ирэх хавар болж магадгүй байна.