Монгол Улсад Нэгдсэн Үндэстний Байгууллага/НҮБ/-ын Цөлжилттэй Тэмцэх Конвенцын Талуудын 17 дугаар бага хурал зохион байгуулагдана. Тус хурал нь Улаанбаатар хотноо наймдугаар сарын 17-28-нд  зохион байгуулагдана. Тухайн жилдээ зохион байгуулах орноосоо шалтгаалаад өөр өөрийн онцлогт тохирсон санал, санаачилга сэдэвчилсэн өдрүүдийг зарладаг уламжлалтай. Энэ удаагийн хурлыг зургаан сэдэвчилсэн өдөртэй байхаар төлөвлөсөн байна. Тухайлбал,

• Газар
• Ус
• Тэсвэрлэх чанарыг нэмэгдүүлэх,
• Агаар, хүнс
• Санхүүжилт
• Хүн төвт өдөр гэх дэд сэдвүүдэд хуваажээ. Мөн бэлчээрийн тэргүүлэх санаачилга, ус болон газрын нэгдсэн менежментийн санаачилга, байгальд түшиглэсэн шийдэл дэд бүтцийн санаачилгыг дэвшүүлжээ.

Монгол Улсын газар нутгийн 75 гаруй хувь нь хөрсний доройтолд өртсөн тул “Тэрбум мод” үндэсний хөдөлгөөн, “Цагаан алт” хөтөлбөр, “Хүнсний хувьсгал” зэрэг санаачилгаар газар, хөрс сэргээх ажлыг тэргүүлэх чиглэл болгожээ. COP17 бага хурлыг зохион байгуулснаар олон улсын туршлага солилцох, мөн газар хөрсний доройтол, уур амьсгалын өөрчлөлт, биологийн олон янз байдлын хомсдол зэрэг харилцан уялдаатай хямралуудыг хамтран шийдэх олон улсын хамтын ажиллагааг ахиулах боломж бүрдэх юм.

Тус бага хуралд НҮБ-ын 197 улс орны төлөөлөгчид, эрдэмтэн судлаачид, иргэний нийгэм болон хувийн хэвшлийн төлөөлөл оролцож, ган гачигт тэсвэртэй байдал, газар хөрс сэргээх зорилтуудыг хэлэлцэнэ. Мөн Монгол Улсын санаачилсан “Бэлчээр ба нүүдлийн мал аж ахуй эрхлэгчдийн олон улсын жил – 2026” (IYRP 2026)-тай уялдан зохион байгуулагдаж, бэлчээрийн тогтвортой менежмент болон эдгээр экосистемээс шууд хамааралтай нэг тэрбум гаруй хүний амьжиргааны асуудлыг олон улсын түвшинд онцлох юм.

Н.ЦОЛМОНБААТАР