Оросуудын хувьд зул сарын баяр гэхээсээ илүү арванхоёрдугаар сарын 31-ний он солигдох мөчийг догдлон хүлээдэг. Хоёр оны зааг дээр олон олон орос хүн Украин дахь дайныг дуусаасай гэж хүсч буйгаа "The Moscow Times" хэвлэлд илэрхийлжээ. Дөрвөн жил үргэлжилж буй дайнаас эгэл жирийн оросууд одоо залхаж байна.

30 настай Андрей "Эх орон нэгтнүүдийнхээ өмнөөс хүсэх зүйл гэвэл дайн дуусаасай гэдэг л байна" гэх аж.

Оросын бие даасан судалгааны байгууллагуудаас үйл ажиллагаагаа тогтвортой явуулж үлдсэн цор ганц газар бол "Levada Center". Тус байгууллагын өнгөрсөн оны арваннэгдүгээр сард явуулсан судалгааг харвал, оросуудын дийлэнх нь буюу 65 хувь нь энхийн хэлэлцээг бодит ажил хэрэг болгох цаг нь ирсэн гэж үзэж байна.

Москва хотын нэгэн оршин суугч нэрээ нууцлан яриа өгөхдөө "Орос оронд жинхэнэ гайхамшиг тохиолдоосой гэж хүсч байна. Зөвхөн энх тайванд хүрсэн цагт, эсвэл мөргөлдөөн түр ч болтугай зогссон тохиолдолд л ийм зүйл болно. Байнгын түгшүүр, хязгаарлалт дор амьдрахаа больсон цагт л гайхамшиг тохионо" гэсэн юм.

Украинчуудын хувьд 2025 он бол дайн эхэлснээс хойших хамгийн их хохирол амссан жил байлаа. Тодруулбал, өнгөрсөн оны эхний 11 сарын байдлаар нас барсан хүмүүсийн тоо 2024 оны мөн үеэс 24 хувиар их байв. Үүний зэрэгцээ ОХУ-ын хүчин стратегийн ач холбогдолтой Покровскийг эзэлсэн зэргээр багагүй ахиц дэвшилтэй байжээ. Гэхдээ том зургаар харвал фронтын шугамд бараг өөрчлөгдсөн зүйл үгүй.

Оросын бие даасан хэвлэл "Mediazona"-д мэдээлснээр дайн эхэлснээс хойш ОХУ 156 мянга гаруй цэргээ алдсан аж. Мэдээж бодит тоо үүнээс хамаагүй их байх магадлалтай.

Талууд энхийн хэлэлцээрт хүрэх гэж удаа дараалан оролдож буй ч амжилт олоогүй хэвээр. Хоёр тал хэн хэнийхээ үндсэн шаардлагад буулт хийхийг хүсэхгүй байна.

Оросын армийн нэгэн цэрэг яриа өгөхдөө "2026 онд зарим нөхцөл байдал тодорхой болоосой гэж цэргийнхэн бид чин зүрхнээсээ хүсч байна. Энх тайван тогтоно гэх итгэл найдвар бага байгаа ч гэлээ Украины нийгэм, дэглэмд томоохон өөрчлөлт гарахыг хүлээж байна. Олон хүний амь үрэгдэхгүй л бол сайн шүү дээ" гэжээ. Тус цэргийн хэлж буй үг Зеленский бол хууль ёсны бус удирдагч гэх Кремлийн мэдэгдлийн тусгал болно. Олны мэдэж байгаачлан Зеленскийн бүрэн эрхийн хугацаа дуусгавар болсон ч дайны цагийн хуулиар тэр албан тушаалаа хүлээлгэн өгөөгүй байгаа билээ.

Дайн эхэлснээс хойш ОХУ энгийн иргэдээ нөлөөллөөс нь аль болох хамгаалахыг хичээж иржээ. Гэвч дөрвөн жилийн хугацаанд цензур, эрчимжүүлсэн цэрэг татлага, барууны хориг арга хэмжээнээс улбаатай улам улам овоорч буй дарамт шахалт, эдийн засгийн хүндрэл гээд дайн амьдралын бүхий л талбарт шургалан орж чадав.

Айл өрхүүдэд санхүүгийн дарамт мэдрэгдэх болсон тул баяр ёслол тэмдэглэх зардлаа хязгаарлаж байна. Гэхдээ уламжлал болсон баяраа тэмдэглэхээр төлөвлөж байгаа гэж оросуудын 87 хувь нь судалгаанд хариулжээ. Москва хотын оршин суугч эмэгтэй ярихдаа "Би урьд өмнө ийм зүйл огт харж байсангүй. Гэхдээ орлогоос үл хамааран хүн бүр л үнийн өсөлт, татварын нэмэгдлийн талаар гомдоллож байна" гэжээ.

Мөн "Telegram", "WhatsApp", "FaceTime" зэрэг платформууд ажиллахаа больсон нь хүмүүсийн өдөр тутмын амьдралд мэдэгдэхүйц нөлөөлж байгаа аж. Цахим хориг энэ төдийхнөөр хязгаарлагдахгүй. 2025 онд батлагдсан шинэ хуулийн дагуу оросууд цахим сүлжээнээс "хэт даврагч" агуулгатай материал хайж болохгүй болсон. Хууль зүйн яамны "хэт даврагч" материал гэж шошголосон хэдэн зуун хуудас жагсаалтад багтах ямар нэг зүйлийг цахим сүлжээнээс хайх юм бол хууль зөрчсөнд тооцогдоно гэсэн үг юм.

Оросын Аюулгүй байдлын алба өнгөрсөн оны эхний хагасын байдлаар 173 хүнд улс төрийн шалтгаанаар эрүүгийн хэрэг үүсгэсэн байна. Энэ нь 2022 оныг бодвол огцом буурсан үзүүлэлт аж. Яагаад гэвэл дайныг эсэргүүцэгсдэд оноож буй хүнд ял шийтгэл, улам улам ихэсч буй цензур зэргийг харсан ард иргэд үгээ хэлэх бус амаа хамхихыг сонгох болсон.

Улс төрийн хавчлага болон цэрэг татлагаас болж дор хаяж 650 мянган орос хүн эх орноосоо дүрвэжээ. "The Moscow Times" хэвлэлд яриа өгсөн нэгэн өсвөр насны хүү "Гадаадын бүх агентад гэртээ эргэн ирэх боломж олгоосой гэж шинэ жилийн хүслээ шивнэлээ" гэжээ.

Дайн дажны хажуугаар хүйсийн цөөнхийн нөхцөл байдал ч хүндэрсэн. "LGBTQ+" хүмүүсийн эрхийг хамгаалдаг "Vykhod" бүлгийн мэдээлснээр 2024-2025 онд дор хаяж 20 хүн энэ төрлийн хэргээр ял авчээ. Тодруулбал, энэ хүмүүс аль 2023 онд Орост хориглосон "LGBTQ+" хөдөлгөөнд оролцсон байна.

"Үр хөндөлт хийлгэх боломжийг хязгаарлах, ижил хүйстнүүдийн суртал ухуулга гэсэн хэргийг бусдад тохох зэргээр хүний хувийн сонголтыг үгүйсгэсэн хуулиудыг 2026 онд хүчингүй болгоно гэж найдаж байна. Бас аль болох хурдан энэ дайныг дуусгаж, бусад улстай харилцаагаа сэргээж, эдийн засгаа хөл дээр нь босгоосой" гэж "LGBTQ+" цөөнхийн төлөөлөл ярьжээ.

Он солигдох мөчид олон орос хүн дайнаас өмнө хэчнээн сайхан амьдардаг байснаа эргэн нэг дурсжээ.

Оренбург мужид жижиг бизнес эрхэлдэг нэгэн эмэгтэй хэлэхдээ "2026 он гарахаас урьтаад нэг алхам ухарч, эргэцүүлэн бодоцгооё. Бүх дэлхий Оросын сайн сайхан, нээлттэй, зочломтгой байдлыг мэдэрч гайхширсан 2018 оны ДАШТ-ий үеийг эргэн санацгаая. Шереметьево нисэх буудлаас Европын аль ч нийслэл рүү очиж болдог байсан тэр он жилүүдийг эргэн саная. Орос хүн бүрт төсөөлж болох хамгийн агуу, халуун дулаан, нэгдмэл хайр, итгэлийг хүсье. Илүү сайн сайхан зүйл өмнө минь байгаа гэдэгт итгүүлэх хүүхэд шиг гэнэн итгэлийг бас хүсье" гэжээ.

Харин өмнөд Краснодар мужид амьдран суудаг эхнэр нөхөр хоёр шинэ онд бүх хүн төрөлхтөнд хайр, уучлалыг хүсч байна. "Хүн бүр хэн нэгнийг гомдоосон эсэхээ эргэцүүлэн бодож, жаахан ч гэсэн эелдэг, зөөлөн байвал түүнийг л аз жаргал гэнэ. Бие биедээ зөөлөн хандаж, хайраа мэдрүүлцгээе" гэж тэд хэлж байна.