Украины ерөнхийлөгч Володимир Зеленский тус улсын аюулгүй байдлыг баталгаажуулсан тохиолдолд л Оростой хийж буй дайныг зогсоох энхийн хэлэлцээнд гарын үсэг зурна гэдгээ онцолжээ. Тодруулбал, өчигдөр (2025.12.31) телевизээр дамжуулан хийсэн шинэ жилийн мэндчилгээндээ тэрбээр энхийн хэлэлцээ “90 хувьтай бэлэн болсон” ч шийдвэрлэх чухал 10 хувь үлдээд байгааг мэдэгдсэн байна. Зеленский хэлэхдээ, эцсийн тохиролцоонд хүрэхийн тулд АНУ болон Европыг багтаасан олон улсын хамтын нийгэмлэгийн дэмжлэг, хамтын ажиллагаа зайлшгүй шаардлагатай гэжээ.

Тэрбээр мөн Орос улсыг дахин шүүмжилж, тус улс өөрөө мөргөлдөөнийг зогсоох хүсэлгүй байгааг онцолсон байна. “Сул дорой хэлэлцээнд гарын үсэг зурах нь мөргөлдөөнийг улам өдөөхөөс өөр үр дүнгүй. Миний гарын үсэг зөвхөн хүчтэй, баталгаатай хэлэлцээ дор л тавигдана” гэж хэлжээ.

Энэхүү мэдэгдэл нь дайны дараах Украины аюулгүй байдлын баталгаа гол асуудал болоод байгаа үед гарч байна. Зеленский мөн Оросын заналхийлэл Европ руу чиглэж болзошгүйг анхааруулж, Украин бол “Европын тав тухтай амьдралын хэв маяг ба ‘Оросын ертөнц’-ийн хооронд орших цорын ганц бамбай” хэмээн онцолжээ.