Болгар Улс еврог албан ёсны мөнгөн тэмдэгтээ болгож, евро бүсийн 21 дэх гишүүн оронболлоо. Евро нь өнөөдрөөс (2026.01.01) эхлэн Болгарын левийг орлож, тус улсын албан ёсны валют болж байна. Болгар улс еврог нэвтрүүлэх бэлтгэлийг олон жилийн турш хийж, 2020 оноос хойш Европын холбооны Валютын ханшийн механизм II (ERM II)-д хамрагдаж байсан нь евро бүсэд элсэх чухал шат байв.

Европын холбооны байгууллагууд Болгар улс инфляцын тогтвортой байдал, төсвийн сахилга бат, валютын тогтвортой байдал болон хууль эрх зүйн нийцлийг хангасан гэж үзэж, евро бүсэд нэгдэхийг нь зөвшөөрсөн байна. Евро бүсэд нэгдэх нь Болгарын эдийн засгийн тогтвортой байдлыг бэхжүүлж, гүйлгээний зардлыг бууруулж, хөрөнгө оруулагчдын итгэлийг нэмэгдүүлэн, Европын холбооны бусад орнуудтай эдийн засгийн харилцааг улам гүнзгийрүүлнэ гэж мэргэжилтнүүд үзэж байна. Мөн засгийн газар еврог нэвтрүүлснээр валютын хэлбэлзэл болон гадаад санхүүгийн эрсдлээс хамгаална гэж мэдэгджээ.

Гэсэн хэдий ч тус улсын дотоодод уг шилжилт янз бүрийн байр суурьтай тулгарч байна. Зарим иргэд үнийн өсөлт болон мөнгөний бодлогын бие даасан байдлаа алдах вий гэсэн болгоомжилж буй. Үүний хариуд эрх баригчид шилжилтийн хугацаанд үнийг давхар харуулах, үндэслэлгүй үнийн өсөлтийг хянах арга хэмжээг хэрэгжүүлж эхэлсэн байна. Шилжилтийн богино хугацаанд бэлэн мөнгөөр төлбөр хийхэд лев болон евро хоёуланг нь ашиглах боломжтой. Дараа нь уг хугацаа дууссанаар евро нь цорын ганц хууль ёсны мөнгөн тэмдэгт болно. Банкууд болон төрийн байгууллагууд валют солих үйлчилгээг тодорхой хугацаанд үнэ төлбөргүй үзүүлэхээр болсон байна.