Ираны инфляци нэмэгдэж, мөнгөний ханш унасантай холбоотой эсэргүүцэл, ажил хаялт үргэлжилж байна. Мөн эсэргүүцдийн жагсаал Тегеранаас бусад хотуудад тархжээ. Тодруулбал, Ням гаригт (2025.12.28) Тегеран хотын Их захын худалдаачид Ираны мөнгөн тэмдэгтийн ханш түүхэн доод хэмжээнд хүрсний дараа ажил хаялт зарласнаас болж жагсаал гарчээ. Улмаар Караж, Исфахан, Шираз, Язд, Керманшах зэрэг хотод жагсаал өрнөж, цагдаагийн байгууллага зарим газарт нулимс асгаруулагч хий ашиглан жагсагчдыг тараахыг оролдсон байна. Харин Ираны засгийн газар эсэргүүцлийг хүлээн зөвшөөрч, ард иргэдийн дуу хоолойг тэвчээртэй сонсоно гэдгээ мэдэгдсэн юм. Ерөнхийлөгч Масуд Пезешкиан жагсагчдын төлөөлөлтэй хэлэлцээ хийхийг Дотоод хэргийн сайдад үүрэг болгосон бөгөөд Төв банкны ерөнхийлөгчийг огцруулж, оронд нь шинээр хүн томилжээ.

Их, дээд сургуулийн оюутнууд ч мөн жагсаалд нэгдэж, дээд удирдагч Аятолла Али Хаменейд хандан “Дарангуйлагчид үх” гэх мэт засгийн газрын эсрэг уриа хашхирч байна.

Зарим жагсагчид 1979 оны Исламын хувьсгалын үеэр түлхэн унагагдсан сүүлчийн шахын гэр бүлийг дэмжиж, “Шах мандтугай” хэмээн уриалсан байна. АНУ-д цөллөгт амьдарч буй сүүлчийн шахын хүү Реза Пехлеви жагсагчдыг дэмжиж байгаагаа илэрхийлж, эдийн засгийн хямралын бурууг одоогийн дэглэмд тохсон байна.

АНУ мөн эсэргүүцлийг дэмжиж байгаагаа илэрхийлж, жагсагчдын зоригийг магтан сайшаажээ.

Ираны асуудал АНУ-ын ерөнхийлөгч Дональд Трамп болон Израилийн ерөнхий сайд Беньямин Нетаньяху нарын уулзалтын гол сэдвүүдийн нэг байв. Трамп Иранд эдийн засгийн ноцтой асуудал тулгарч байгааг хэлсэн ч дэглэм солихыг ил тод дэмжээгүй байна. Өмнө нь Иран, Израиль улс богино хугацааны мөргөлдөөн хийж байсан. Эл үеэр АНУ Ираны цөмийн байгууламжуудад цохилт өгсөн. Үүнээс хойш Иран цөмийн хөтөлбөрөө энхийн зорилготой гэж мэдэгдэж ирсэн бөгөөд цаашид гаднын халдлагад хатуу хариу өгнө гэдгээ анхааруулсан юм. Ираны дээд удирдагч Аятолла Али Хаменей одоо болж буй жагсаалын тухай хэлэхдээ,  гадаадын дайснууд улс дотор үймээн самуун үүсгэхийг оролдсон ч ард түмэн тэдний хүсэлд автаагүй гэж мэдэгдсэн байна.