ОХУ-ын Гадаад хэргийн яамны хэвлэлийн төлөөлөгч Мариа Захарова болон Хойд Солонгосын удирдагч Ким Жон Уны дүү Ким Ё Жон нар Мягмар гаригт /2025.12.30/ шинэ жилийн бэлэг солилцжээ. Хоёр улсын харилцаа аюулгүй байдал, дипломат байдал болон бусад чиглэлд гүнзгийрч буйн илэрхийлэл нь энэ бэлэг болов.

Хойд Солонгосын эрх баригч Ажилчны намын төв комиссын дэд дарга Ким Ё Жоны бэлгийг ОХУ-д суугаа Хойд Солонгосын Элчин сайд Син Хун Чол Мариа Захаровад гардуулан өгчээ. Ким Ё Жон Оросын талд том ваар илгээсэн бололтой. Тэрхүү ваарных нь зургийг Мариа Захарова цахим сүлжээндээ нийтэлжээ.

Харин Захарова хариуд нь Ким Ё Жоны хөрөг зургийг бэлэглэсэн. Тэрхүү хөрөг зургийг нэрт зураач Никас Сафронов зуржээ. "Сафронов бидний хэн нь ч Ким Ё Жонтой биечлэн уулзаж байгаагүй. Гэхдээ энэ хөрөг зурагт түүний зөөлөн, эмэгтэйлэг байдал, хүч чадал, шийдэмгий зан шингэсэн гэж итгэж байна" гэж Захарова хэлжээ.

ОХУ, Хойд Солонгос улсууд 2024 оны зургадугаар сард Пёньянд болсон удирдагчдын уулзалтаас хойш харилцаагаа улам бэхжүүлсэн. Энэ сард л гэхэд Ким Жон Ун, Путин нар шинэ жилийн мэндчилгээ солилцсон билээ. Ким Жон Ун захидалдаа хоёр улсын харилцааг үнэт хамтын хөрөнгө гэж тодорхойлоод, өнгөрч буй 2025 онд холбоотны агуу намтрыг тогтвортой үргэлжлүүлэн бичсэн гэж бодож байгаагаа дурджээ.