АҮЭБЯ-аас шатахуунтай холбоотой цаг үеийн асуудлаар өнөөдөр /2025.12.26/ мэдээлэл хийв.

Аж үйлдвэр, эрдэс баялгийн дэд сайд Б.Энхтүвшин:

-Өнөөдрийн байдлаар буюу арванхоёрдугаар сарын 25-ны өдөр 62719 тонн АИ-92 бензин, 2387тонн АИ-95 бензин, 168795 дизель түлш, ТС-1 буюу онгоцны түлш 9780 тонныг Сүхбаатар, Цагаан нуур, Эрээн зав, Булган, Замын-Үүдийн боомтуудаар оруулж ирсэн. Өчигдөр БНХАУ-аас 26 вагон АИ-95 бензин орж ирсэн. Үүний хуваарилалтуудыг одоо хийгдэж байна. Мөн дахин 26 вагон дизель түлш Замын-Үүдийн боомтоор орж ирснийг шилжүүлэн ачиж байгаа. Үргэлжлүүлэн БНХАУ-аас долоон мянга орчим АИ-92 бензин орж ирнэ. Үүнийг энэ ондоо багтаан авах зорилттой ажиллаж байна.

Одоогийн байдлаар Улаанбаатар хотын бензин, түлшний асуудал харьцангуй тогтворжсон. Хөдөө орон нутаг руу шатахуун нийлүүлэлтийг хийж байгаа.

Хангайн бүс болон төвийн бүсийн аймгуудад шатахуун хадгалах сав байхгүй учраас шууд борлуулалтыг хийнэ. Ингэснээр тухайн аймгуудын бензин шатахуунтай холбоотой асуудал тогтвортой болно. ОХУ-аас нийлүүлэгдэх 20 орчим тонн авто бензинийг энэ долоо хоногтоо татан авахаар хуралдаж, тохиролцлоо. Тус хурлаар ОХУ-ын тал “АИ-92 энгийн бензинийг 60 мянган тонноос илүүг нийлүүлэх боломжгүй, АИ-95 бензинийг хүссэн хэмжээгээр нийлүүлэх боломжтой. Гэхдээ бид албаны хүмүүстэй холбогдож энэ долоо хоногт тодорхой хариуг өгнө” гэдгийг хэлсэн.

Энэ долоо хоногоос нефть бүтэгдэхүүний нийлүүлэлт тогтвортой болно. Арванхоёрдугаар сард 134240 тонн дизель түлш нийлүүлэх захиалга өгсөн. Одоогийн байдлаар 168185 тонн дизелийн түлш нийлүүлэгдсэн. Улаанбаатар хот болон хөдөө орон нутагт дизелийн түлш хангалттай байгаа. Ирэх онд АИ-92 энгийн бензинийг  тодорхой хэмжээнд нийлүүлэх захиалга өгсөн. ОХУ ямар шаардлага, нөхцөлийн дагуу нийлүүлэхийг мэдэхгүй байна. Өгсөн хэмжээгээр нь авч, түгээнэ. Үнийн тухайд өөрчлөлт орохгүй 2590 төгрөгөөр борлуулагдана.

Н.Цолмонбаатар